Sipas të dhënave të siguruara nga CNA, përgjimet e kryebashkiakut të Tiranës, Erion Veliaj, nga burgu i Durrësit, hedhin dritë mbi një sërë aktivitetesh që lidhen me menaxhimin e imazhit të tij dhe ushtrimin e presionit ndaj prokurorëve dhe gjyqtarëve të GJKKO.
Përgjimet zbulojnë një strategji të detajuar të menaxhimit të komunikimeve dhe mediatizimit të intervistave të Veliajt, që ai vetë harton dhe përgatit.
Ky proces përfshin një sërë televizionesh dhe gazetarësh, duke përfshirë kanale të njohura si Top Channel, Report TV, dhe Euronews, të cilët, sipas të dhënave të përfshira në përgjime, kanë shërbyer si kanale për të transmetuar mesazhe të caktuara dhe për të ushtruar presion në drejtim të institucioneve të drejtësisë.
Në bisedat e tij, Erion Veliaj diskuton me vëllain dhe bashkëshorten e tij, Ajolën, për detajet e intervistave mediatike dhe mënyrën se si duhet të drejtohen pyetjet, duke kërkuar që ato të hartohen nga ai vetë për të shmangur çdo pyetje që mund të përdoret kundër tij.
Në një bisedë me bashkëshorten e tij, Ajolën, Veliaj shprehet me tone të ashpra ndaj ministrit të Drejtësisë, Ulsi Manja, duke e quajtur atë “qelbësirë” dhe “katundar të ndyrë”. Ai i thotë Ajolës se nuk do t’ia falë kurrë veprimet e tij dhe shprehet me nxitim se “do ta mbysë me thonj”.
Ai shprehet se nëse nuk arrin të dalë nga burgu brenda katër ditëve, rrezikon të qëndrojë atje për katër muaj të tjerë.
Gjithashtu është shumë i kujdesshëm për mënyrën se si trajtohen intervistat në media, duke kërkuar që të mos e përqeshin për faktin se është në burg dhe që gazetarët të jenë të kujdesshëm në transmetimin e materialeve të tilla.
Në orën 21:29, Erion Veliaj bisedon me Ajolën, por në një moment të caktuar biseda zhvillohet ndërmjet “Vipit” dhe Erionit. Nga konteksti i bisedës së zhvilluar, “Vipi” i kërkon Erionit që të japë mesazhe pa fyerje, pa ofendime, pasi në momentin që ka sharje apo shantazhe, quhet kërcënim. I tregon se kjo gjë mund të përdoret kundër tij, pasi do të shprehen se ai është brenda dhe kërcënon, imagjinoni po të dalë jashtë. Këtë gjë, “Vipi” tregon se ia kanë thënë edhe miq nga PD-ja, të cilët më përpara kanë shkruar kundër tij (Erionit). “Vipi”, në vijim të bisedës, i thotë se ‘mikeshës’ i ka thënë që t’i tregojë ‘lalit’ që të mendojë sikur është në ‘Big Brother’”, thuhet në përgjimet e siguruara.
Përgjimi i datës 18 shkurt 2025 është një tjetër dëshmi e mënyrës se si Veliaj ka përdorur lidhjet e tij për të organizuar aktivitete që kanë të bëjnë me profesionistët e ligjit.
Në këtë bisedë, ai i dërgon një mesazh Maks Haxhisë, një avokat i njohur, për të ndërmarrë veprime kundër ILD-së, duke mobilizuar Këshillin e Përgjithshëm të Dhomës së Avokatisë për të reaguar kundër këtij institucioni.
Ky veprimi e bën të qartë se Veliaj është në kontroll të shumë aspekteve të jetës ligjore dhe mediatike të tij, duke kërkuar që ato të drejtohen sipas interesave të tij.
Përgjimet tregojnë se Veliaj kërkon që intervistat e tij të shpërndahen në disa gazeta të njohura, duke përfshirë “Dita”, “Tema”, dhe “Shqiptarja”, si dhe duke siguruar që ato të shpërndahen në mënyrë të sinkronizuar për të rritur ndikimin e fushatës së tij.
Ai bën të qartë se intervistat, si ato te “Report TV” dhe “Top Channel”, janë të dizajnuara për të ofruar një pamje të kontrolluar dhe të favorshme për të.
Në përgjime të tjera, siç është biseda e datës 19 shkurt 2025, Veliaj diskuton për detaje më të thella lidhur me fushatën e tij mediatike dhe politikat e tij për të mbajtur nën kontroll imazhin publik.
Për shembull, ai kërkon që të bëhen intervista dhe transmetime të tjera për të mbajtur “presionin” në drejtësinë shqiptare dhe për të siguruar që “avokatët amerikanë” të informohen rregullisht për zhvillimet e rastit të tij.
Propaganda për mbrojtjen e Erion Veliajt vazhdon me ndihmën e vëllait të tij, Arbër Veliaj. Nëpërmjet kompanisë “One”, ai financoi reklamat dhe shpërndarjen e shkrimeve që sulmojnë SPAK-un dhe prokurorët.
Këto sulme u kryen përmes Mero Bazes, i cili vepron për llogari të Erion Veliajt, ndërsa vëllai paguan për këtë fushatë propagandistike me qëllim që Erioni të ndiqet në gjendje të lirë.
Në përgjime të tjera, zbulohet se Erion Veliaj kërkon që Arbër Veliaj të kontaktojë Klevisin e Burgjeve dhe t’i thotë se në takim me të mund të shkojnë disa individë, përfshirë Mero Bazen, Ylli Manjanin, Mondin, Ton Gogun, Admiri dhe Sara .
Veliaj kërkon që të dërgohen porosi dhe përfaqësues të feve në takime. Po ashtu, ai kërkon që Arbri të merret me median dhe të mbajë presionin mediatik, duke përmendur materialet dhe lajmet për të lexuar, përfshirë ato të Ilir Yzeirit.
Përgjimet e siguruara nga CNA tregojnë një kryebashkiak të arrestuar që përdor çdo mundësi mediatike dhe juridike për të manipuluar opinioni publik dhe për të ushtruar presion ndaj institucioneve të drejtësisë.
Kjo është një tjetër dëshmi e përpjekjeve të tij për të kontrolluar narrativën dhe për të mbajtur një pozicion të fuqishëm, ndonëse ndodhet në një situatë të vështirë ligjore.
