Ditën e sotme, kryeministri Edi Rama ka mbajtur fjalën në Kuvend. Ai ka komentuar përgjimet e publikuara dy ditë më parë nga “Bild”, ku është shprehur se çdo bisedë e zakonshme, kur del nga konteksti, duket e pazakontë.
“Ato përgjime po e kryejnë funksionin e tyre për objektivin që janë bërë. Për një betejë zgjedhore ku ka qenë e instaluar e gjithë PD. Është vendosur antena vetëm mbi shtabin e Partisë Socialiste, dhe asnjë nga pala tjetër. Pse nuk pati asnjë kapje në flagrancë? Pse dolën tani? Pse shkuan në Gjermani? Dhe pse lajmet e Gjermanisë i paraprin “qim.neti” i Shqipërisë?”.
Kryeministri gjithashtu se insiston për të paditur gazetarin gjerman Peter Tiede dhe se do u kërkojë gjykatave gjermane të zbardhin gjithçka që është thënë në adresë të tij.
E ndërsa për datën e zgjedhjeve, Rama ka thënë se shteti nuk do të gjunjëzohet në 30 qershor, por ata që deri tani i kanë bërë ligjet vetë duhet të mendohen pas zgjedhjeve.
“4 javë është afati për të ngritur padi në Gjermani. Do t’i kërkoj gjykatave gjermane të zbardhin gjithçka që është thënë në adresën time. Atë bisedë e kam bërë dhe do ta përsërisja prapë. Kam bërë me gjithë shtabet e në të gjithë Shqipërinë, me mijëra”, tha Rama.
Rama u shpreh:
“Më çojnë sms nga jashtë e më thonë që do vijnë të votojnë më 30 qershor. Kjo ka të bëjë me si do jetë Shqipëria pas 30 qershorit. Përgjigja e 30 qershorit do të jetë e plotë. Të gjithë ata që mendojnë se ka ardhur koha e rrumpallës mbi ligjet që vetë kanë bërë, duhet të mendohen. Është një luftë kundër, ose pro, drejtësisë. Shteti nuk gjunjëzohet dot”.
