Policia spanjolle ka arritur të arrestojë një shtetas shqiptar, të njohur si një prej udhëheqësve të “Kartelit Ballkanik,” përgjegjës për 2.3 tonë kokainë që u kapën disa ditë më parë në anijen e peshkimit “Bestarruza,” ku janë arrestuar gjithsej 4 anëtarë të ekuipazhit, përfshirë dy shqiptarë, një argjentinas dhe një afrikan nga Cabo Verde.
Operacioni i DEA-s Amerikane, në bashkëpunim me strukturat e autoriteteve policore spanjolle, sipas mediave, ka shpërbërë këtë celulë të vendosur në Galicia, në pritje të ngarkesave të reja me kokainë. Përveç sasisë së madhe të drogës të sekuestruar në anije, kontrolli në A Coruna ka zbuluar 200 mijë euro cash dhe një automjet tip “Maserati” në pronësi të liderit të grupit. Shqiptari është arrestuar në një hotel, sapo ishte nisur drejt Madridit, pasi mori lajmin e kapjes së ngarkesës së kokainës.
Në deklaratën e tij, kapiteni i anijes së peshkimit, i cili jetonte në A Coruña, ka treguar Policisë se “Karteli Ballkanik” po e kishte mbajtur gruan e tij peng derisa operacioni të përfundojë me sukses. Megjithëse agjentët nuk i besuan kësaj dëshmie, ata kanë kryer një operacion të specializuar në shtëpinë e tij. Më pas u konfirmua se asgjë nga këto pretendime nuk ishte e vërtetë, pasi gruaja u shfaq më vonë e shoqëruar nga një e mitur dhe me dëshirën e saj.
