Në Oslo ka ndodhur një sulm me armë zjarri në një diskotekë, që frekuentohej nga homoseksualë.
Bëhet e ditur se ngjarja ndodhi rreth orën 01:00 të ditës së sotme, ku dy persona humbën jetën dhe rreth 20 mbetën të plagosur.
Ndërkohë janë publikuar pamjet e sulmit në një lokal natë të komunitetit LGBT në Oslo të Norvegjisë, që terrorizoi vendin nordik. Në video duket se autori i armatosur hyn brenda dhe me breshëri qëllon drejt personave brenda.
Gjithashtu, pamjet tregojnë turmat e njerëzve që dalin me vrap të frikësuar nga ambienti i lokalit ku po qëndronin, pas të shtënave. Theksojmë se policia ka arrestuar brenda pesë minutave autorin e dyshuar të ngjarjes, ndërsa nuk dihet ende se cili ishte motivi, megjithëse dyshohet për një akt terrorist.
Një grua dëshmitare rrëfen: Dukej një skenë lufte, me shumë njerëz të shtrirë në tokë e me plagë në kokë. Vrasësi ishte tepër i vendosur dhe i përqendruar, sidomos për pjesën ku duhej të shënjestronte. Kur e kuptova se ishte diçka serioze, arrita të largohesha. Një burrë qëndronte i shtrirë në tokë, mes një pellgu gjaku.
Pas sulmit të dyshuar islamist ndaj një klubi të homoseksualëve në Oslo me dy viktima, shprehet me tronditje edhe kancelari gjerman, Olaf Scholz. Lufta kundër terrorit na bashkon, ka thënë Scholz.
