Ditën e sotme në Ministrinë e Financave u zhvillua takimi i radhës mes përfaqësusesit të Ligës Profesioniste Edvin Liobohova, deputetit Fidel Ylli i cili është i dërguari i kryemisnitrit Rama në këto takime dhe përfaqësuesve të ministrisë së Financave.
Por duket se edhe në këtë takim të dytë mes palëve nuk u arrit diçka konkrete, pasi ende nuk është plotësuar kërkesa kryesore e Ligës Profesioniste, ligji i sponsorizimeve. Me këto kushte të pa plotësuara bojkoti mbetet në fuqi ndërsa propozimet e Ligës tashmë do ti paraqiten kryeministrit Rama ditën e premte.
“Sot kishim takimin e dytë me Ligën Profesioniste të futbollit. Ishte një takim ku në të shumtë e rasteve problemet e Ligës thuajse se janë të zgjidhura, kemi ngelur vetëm te problemi i Ligjit të Sponsorizimit. Edhe Ministrja ishte shumë bashkëpunuese sot.
Kërkohet një konfirmim edhe nga qeveria për faljen e gjobave. Në qoftë se do të bëhet kjo, do të bëhet me një ligj specifik në parlament. Kërkon një vendim politik, nuk mund të bëhet një falje vetëm për Ligën apo për futbollin, por do bëhet për të gjitha bizneset. Ne mendojmë që përgjigja përfundimtare do të jepet ditën e premte, mbasi ne të bisedojmë me kryeministrin, do t’i japim zgjidhje përfundimtare gjithë këtyre problemeve që Liga ka shprehur.
Unë e kam thënë që në fillim, që kryeministri është shefi i qeverisë, por në fund të fundit kryeministri punon me stafet. Nuk mund të marrë vendime pa u konsultuar me ministren dhe grupin e punës.
Do të jetë një vendim që sportit do t’i vlejë për një afat të gjatë. Debatet sjellin zgjidhen e problemit, jam i bindur që kjo situatë do të zhbllokohet shumë shpejt. Kur flitet për financat, gjithë ministrat dhe këshilltarët debatojnë. Jemi në një vit të vështirë, tërmet, pandemi, biznese të rrënuara dhe qeveria ka vështirësi të mëdha. Janë zgjidhur 90% e kërkesave, ka ngelur vetëm Ligji i Sponsorizimit. Ka 2 variante, varjani jonë dhe i Ligës. Të dyja variantet konvergojnë, vetëm duhet gjetur modaliteti se si do zgjidhet”, u shpreh Fidel Ylli.
