Vetëm disa minuta ka zgjatur numërimi i 11 kutive të votimit për bashkinë e Lezhës në KQZ. Pas procesit të numërimit, u konstatua se vetëm një votë ishte numëruar gabim.
Vota i përkiste Eduard Ndocajt, ndërkohë që i ishte kaluar kandidatit fitues nga PS, Pjerin Ndreut.
Vendimi për hapjen e kutive u vendos gjatë mbledhjes së djeshme, pas kërkesës së Partisë Konservatore Albania e cila përfaqësohet nga Ndocaj.
Por edhe dy ditë më parë, me anë të një kërkese të depozituar në KQZ, edhe Partia Demokratike kërkoi që të kishte materialet zgjedhore. Kjo kërkesë iu mohua deri në pikën e pjesëmarrjes në votime.
Materialet zgjedhore, sipas KQZ, do të dorëzohen më vonë pranë Arkivit të Shtetit, dhe me pas i takon këtij institucioni të vendosë nëse do t’jua vendosë në dispozicion palëve të interesuara.
Në këtë mënyrë, PD nuk ka sesi të verifikojë nëse rezultojnë votues edhe persona që në 30 qershor nuk mund të kenë qenë në qendrat e votimit.
Por nga ana tjetër, KQZ po bën gati për PD të gjitha materialet e tjera të kërkuara që janë jashtë kutive si: tabelat e rezultateve, apo pamjet filmike të grupeve të numërimit.
Ky proces kërkon kohë, pasi janë rreth 20 mijë faqe dokumente që duhet të fotokopjohen.
