Ka përfunduar tashmë mbledhja e Kolegjit të Kryetarëve në Partinë Demokratike.
Sipas informacioneve të marra mësohet se ata janë thirrur nga Basha për të diskutuar mbi vendimin për përjashtimin nga Grupi Parlamentar të ish-kryeministrit Berisha.
Mësohet se Basha ka kërkuar që kryetarët e degëve të kishin celularët e tyre të fikur me qëllim shmangien e çdo mundësie që informacionet të rrjedhin në media. Duket se Basha ka përmendur si argumente për përjashtimin e Berishës edhe prova që dyshohet se mund ti kenë ardhur më herët nga amerikanët.
Edhe gjatë mbledhjes me deputetët, Basha kishte thënë se ai e kishin marrë vendimin për përjashtimin e Berishës për sigurinë e tij dhe të familjes së këtij të fundit.
Mbledhja e nisur në orën 11:00 ka zgjatur 1 orë e 45 minuta.
Në përfundim të kësaj mbledhje deputeti dhe njëkohësisht edhe drejtues i PD në Durrës, Ferdinand Xhaferaj në një prononcim të shkurtër për mediat mbështeti vendimin e liderit democrat Lulzim Basha duke thëne se janë shmangur kostot afatgjate të Partisë Demokratike dhe Shqipërisë.
Fjala e plotë e Ferdinand Xhaferraj:
“Është vendimi më i vështirë i kësaj parti. Cfarëdo lloj vendimi do të kishte kostot e veta. Vendimi u mor në limite kohore. Është një nga vendimet që merr parasysh eliminimin e kostove afatgjata të Partisë Demokratike që do të thotë vazhdimi për një kohë të gjatë të kësaj qeverisjeje”- tha Xhaferaj
“Përjashtimi i z. Berisha ka trazuar ujërat në PD, sidomos dhe pas deklaratave të z. Sali Berisha që do të ndjekë rrugët statutore për t’i kthyer PD-së sovranitetin.Berisha ka deklaruar gjithashtu se do zhvillojë një tur takimesh në Shqipëri.
Qëllim kryesor i kësaj mbledhjeje është për të shpjeguar arsyet që e çuan në largimin e Berishës nga grupi parlamentar i PD. Basha synon të mbajë të bashkuar PD-në pas këtij vendimit”.
