Ashtu si u lajmërua edhe më herët, Partia Demokratike ka mbledhur ditën e sotme Grupin Parlamentar. Mësohet se mbledhja e zhvilluar në selinë blu ka zgjatur një orë dhe tema e diskutimit ka qenë seanca e nesërme plenare, në të cilën pritet që të miratohet kabineti i ri qeveritar dhe të aprovohet programi i ri qeverisës “Rama 3”.
Gjithashtu mësohet se Partia Demokratike do ta përqendrojë diskutimin në tri çështje kryesore siç janë: pandemia e COVID-19, tërmeti dhe kriminaliteti në vend. Sipas PD-së këto janë çështjet ku Partia Socialiste ka dështuar.
Gjithashtu, mësohet se ditën e nesërme nuk do të ketë bojkot në Kuvend nga Partia Demokratike, e cila ka vendosur të qëndrojë në sallë gjatë gjithë seancës.
Kujtojmë se seanca e nesërme plenare do të nisë në orën 10:00 dhe do të jetë e ndarë në tri faza, ku në fazën e parë do të bëhet prezantimi i programit qeverisës të qeverisë “Rama 3”, në fazën e dytë, e cila është parashikuar të nisë në orën 13:00, do të ketë pyetje nga deputetët dhe diskutime e debate, ndërsa faza e fundit, e parashikuar në orën 14:00, përfshin votimin e qeverisë dhe programit “Rama 3”. Po ashtu bëhet me dije se në fazën e dytë, demokratët kanë vendosur të mos bëjnë pyetje në lidhje me përbërjen e Këshillit të Ministrave dhe programin e Ramës përgjatë viteve 2021-2025.
