Prokuroria e Fierit ka përfunduar hetimet dhe ka dërguar për gjykim Azgan Mernicën, i akuzuar për vrasjen e punonjësit të Policisë së Shtetit, Novruz Cenalia.
Ndaj tij rëndojnë tre akuza: “Vrasje e punonjësve të Policisë së Shtetit”, “Mbajtje pa leje dhe prodhim i armëve, armëve shpërthyese dhe municionit” dhe “Drejtim i automjeteve në mënyrë të parregullt”.
Ngjarja ndodhi më 13 maj 2024, në fshatin Baltëz të Fierit. Konflikti mes viktimës dhe të akuzuarit nisi për shkak të një manovre të rrezikshme në rrugë. Ndërsa drejtonte automjetin e tij, Mërnica hyri me shpejtësi në një kthesë, duke rrezikuar përdoruesit e rrugës.
Punonjësi i policisë Novruz Cenalia, i cili ndodhej me automjetin e tij, i tërhoqi vëmendjen për veprimin e rrezikshëm.
Sipas hetimeve, Mërnica ndaloi makinën, zbriti me një çantë ku mbante armën dhe iu afrua policit, i cili ende ndodhej brenda automjetit të tij.
Në këtë moment, ai nxori një pistoletë dhe qëlloi në fytyrë efektivin Cenalia, duke i shkaktuar vdekjen e menjëhershme. Viktima ishte i veshur me uniformën e forcave speciale “Shqiponja”, çka e bënte të dukshme identitetin e tij si punonjës policie.
Prokuroria e Fierit ka shprehur angazhimin për hetimin e plotë të rastit dhe vënien para drejtësisë të autorëve të krimeve kundër jetës dhe autoritetit të shtetit. Procesi gjyqësor ndaj Azgan Mernicës pritet të zhvillohet në ditët në vijim.
