Një zjarr ka përfshirë pasditen e së enjtes një banesë dykatëshe në lagjen Uznovë të Beratit.
Sipas njoftimit zyrtar nga Drejtoria e Mbrojtjes nga Zjarri në Bashkinë Berat, alarmi është dhënë rreth orës 16:20, ndërsa në vendngjarje janë dërguar menjëherë tre automjete zjarrfikëse dhe një grup emergjence.
Zjarri ka përfshirë katin përdhes të banesës me pronar Riza Keçi. Falë ndërhyrjes në kohë të zjarrfikësve, zjarri është izoluar pa rrezikuar jetën e banorëve.
Sipas raportimeve paraprake, janë shkaktuar dëme materiale të pjesshme, ndërkohë që tymi ka përshkuar të gjitha ambientet e shtëpisë.
Shërbimi zjarrfikës vijon hetimet për të përcaktuar shkakun e rënies së zjarrit.
