Ministria e Financave u ka kërkuar bashkive në të gjithë vendin që të aplikojnë lidhur me fondet në dispozicion për programet e strehimit.
Në një shkresë zyrtare drejtuar bashkive në vend, Ministria e Financave ka bërë me dije se pjesa më e madhe e shumës së fundit do të shkojë për familjet që përfitojnë bonusin pasi shtëpitë e tyre janë dëmtuar nga tërmeti.
Më tej në letër shpjegohet se sa është shuma e përcaktuar për secilën nga kategoritë e strehimit. Konkretisht, nga 1.8 miliardë lekë që është shuma totale 1.6 miliardë lekë do shkojnë për bonusin e qirasë, 203 milionë lekë do të shkojnë për subvencionimin e interesave të kredive dhe 6 milionë lekë grant i menjëhershëm.
“Ndarja dhe përdorimi i fondeve buxhetore për shpenzimet korrente për strehimin në vitin 2021 do të synojë: lehtësim për qytetarët e blerjes së banesave me kosto të ulët nëpërmjet subvencionimit të interesave të kredisë dhe grantit të menjëhershëm;
mbështetjen financiare për subvencionimin e pagesës së qirasë për familjet e pastreha sipas ligjit nr 22/2018 si dhe për familjet e mbetura të pastreha si pasojë e fatkeqësisë natyrore të tërmetit; angazhimin e njësive të vetëqeverisjes vendore duke rritur kontributin e përgjithshëm në bashkëfinacinimin e programeve të subvencionimit”, thuhet në shkresë.
Në përfundim Ministria e Financave u ka kërkuar bashkive që të nxitojnë sepse afati për dorëzimin e kërkesave për subvencionimin e qirasë dhe grantit të menjëhershëm është deri në 31 janar 2021.
Në një tjetër dokument, Ministria e Financave ka sqaruar me detaje edhe mbi projektet e investimeve për strehim për vitin 2021, ku thuhet se vlera e tyre do të jetë 300 milionë lekë, nga të cilat 140 milionë lekë që do të përdoren për financimin e projekteve në vazhdim nga viti 2020 dhe 160 milionë lekë janë planifikuar për projektet e reja të strehimit.
Afati për bashkitë që do të duan të përfitojnë mbështetje buxhetore për projektet e strehimit në këtë kategori përmes aplikimeve është deri më datë 15 mars 2021./Gazetareforma.com/
