Një histori që tejkalon kufijtë e dhimbjes u bë publike sot në emisionin “Me Zemër të Hapur”, ku një nënë ngriti zërin për të kërkuar drejtësi dhe siguri për vajzën e saj.
Ajo denoncoi ish-bashkëshortin, me të cilin dikur kishte ndërtuar një familje, por që, sipas saj, e kishte kthyer jetën e tyre në një kalvar vuajtjesh.
Nëna rrëfen se ka qenë viktimë e dhunës së vazhdueshme dhe sjelljes abuzive të tij.
Pas divorcit, situata u bë edhe më e rëndë, pasi ajo pretendon se ish-bashkëshorti ka abuzuar seksualisht me vajzën e tyre gjatë takimeve që kishin pas ndarjes.
Nëna kërkon që drejtësia të veprojë, duke e bërë publike historinë e saj në përpjekje për të mbrojtur të bijën.
Nëna e 3-vjeçares të dyshuar të abuzuar: Jam martuar me mblesëri. Kam pasur dyshime se mund të jetë i dhunshëm, por thashë mund të ndryshojë. Kishte pasur një fejesë ai dhe unë vija nga eksperienca të tjera. Më ka bërë përshtypje se kishte në rrjetet sociale një foto sikur ishte drogaxhi. Nuk e di nëse pinte drogë. Ishte komandues në familjen e vet. Ky person është nga Berati. Nga Berati në Tiranë e solla unë, atje ka jetuar me njerkën. Mamaja i kishte ikur në Itali, ishte martuar me tjetër.
Babai i vet kishte qenë dhunues. Babai i tij kishte ndërruar jetë. Më dhunonte kur isha shtatzënë. Nuk ta jepte përshtypjen që ishte njeri aq i keq, sepse ishte i komunikueshëm kështu me shoqëri.
