Drejtësia greke ka dënuar me burgim të përjetshëm 21-vjeçarin shqiptar, Aleksandër Lucaj, dhe 23-vjeçarin grek, Manilos Bukuras, pasi akuzohen për përdhunimin dhe vrasjen makabre të studentes greke 21 vjeçe, Eleni Topaludhi.
Mediat greke raportojnë se Gjykata e Athinës nuk ka pranuar asnjë nga lehtësimet e kërkuara nga avokatët mbrojtës, duke dhënë dënimin maksimal për dy të rinjtë.
“Gjykata unanimisht ju shpall fajtor pasi akuzoheni për përdhunim në grup dhe vrasje me paramendim të Eleni Topaloudit. Ata nuk meritojnë asnjë zbutje,”-tha në sallë prokurori duke përmendur edhe njëherë krimin e kryer nga dy të rinjtë, 21 dhe 23 vjeç.
Sipas prokurorit, dy të pandehurit, nuk kishin shfaqur asnjë pendesë për krimin e bërë, pasi më herët ata kishin kërkuar zbutje dënimi me pretendimin se ishin penduar, kishin një moshë të re dhe ishin sjellë mirë gjatë periudhës së burgimit.
Përveç këtij dënimi, 21-vjeçari shqiptar do të ulet sërish në gjykatë më 3 qershor, pasi akuzohet për përdhunimin e një 19-vjeçareje invalide, bashkë me një 21-vjeçar rom.
Përdhunimi i 19-vjeçares invalide, po në ishullin Rhodes, u krye vetëm 3 ditë pas vrasjes së Eleni Topaludhi, ndërsa akoma policia zhvillonte operacionin për identifikimin e trupit të pajetë që u gjet në brigjet e ishullit dhe vrasësve.
Vrasja e studentes greke
Aleksandër Lucaj, Manolis Koukouras dhe studentja Eleni Tofaloudis kanë qenë së bashku në shtëpi mbrëmjen e 27 nëntorit. Policia dyshon se ngjarja ndodhi pasi vajza ka refuzuar të kryejë marrëdhënie me të dy dhe në këtë moment është tensionuar situata. Ajo u qëllua me hekur në kokë.
Më pas, dy të rinjtë e lidhën me litar nga këmbët vajzën 21-vjeçare dhe e hodhën në det. Trupi i të ndjerës u gjet të nesërmen e 28 nëntorit. Mjekët konfirmuan se Eleni kishte humbur jetën si pasojë e mbytjes, çka do të thotë se ajo ishte gjallë kur u hodh në det.
