“Arrest me burg” , kjo është masa që gjykata e Durrësit ka marrë për 7 të dyshuarit për marrëdhënie seksuale në grup me të një të mitur 13-vjeçare nga qyteti i Kavajës.
Seanca u zhvillua me dyer të mbyllura sipas parashikimeve të Kodit të Drejtësisë Penale për të miturit dhe Kodit të Procedurës Penale, paraditen e kësaj të hëne nga ora 10:30 deri në orën 13:00.
Si autorët, ashtu dhe viktima janë që të gjithë minorenë. Pas marrjes në pyetje të të akuzuarve, gjykata la në fuqi vendimin e mëparshëm të datës 1 shkurt për t’i mbajtur të miturit në burg, siç kërkoi edhe Prokuroria pranë Gjykatës së Shkallës së Parë të Durrësit.
Megjithatë, njëri nga të pandehurit vijon të jetë në kërkim, ndaj vetëm 7 u njohën me masën e sigurisë ndaj tyre.
Ndërkohë babai i të miturës, i traumatizuar nga kjo ngjarje, ka deklaruar se do të largohet nga vendi bashkë me familjen, drejt një shteti të Bashkimit Europian.
