Kryetari i Partisë Republikane Fatmir Mediu ka prezantuar ditën e sotme 36 kandidatët për deputetë në qarkun e Tiranës. Ndërkohë, ditën e sotme kryetari i PD-së Lulzim Basha nënshkroi marrëveshjen me kryetarin e PAA-së Agron Duka për përfshirjen e kandidatëve nga PAA në listat e demokratëve, ndërsa pritet që marrëveshje të nënshkruhen edhe marrëveshje me partnerët e tjerë të opozitës.
Mediu gjatë prezantimit të kandidatëve ka lëshuar një mesazh edhe për Bashën, ku është shprehur se për të ndërtuar një koalicion vlerash, duhet të respektohet dhe vlerësohet vlera e çdo partie.
“Historia e të djathtës është histori njerëzish që e kanë krijuar atë. Nuk mund të ketë sukses një parti politike, një opozitë, në qoftë se nuk do të dijë të vlerësojë, jo vetëm historinë e vet si vlerë e shkruar e historisë , e arritjeve, por sidomos si vlerë e kapitaleve njerëzore që kanë krijuar këtë histori.
E djathta duhet të bashkohet, por jo për të shërbyer si aneks apo qoshe rehatie për këdo politikan apo parti politike. E djathta duhet të bashkohet në radhë të parë në çdo qendër votimi, për të garantuar zgjedhje të lira dhe të ndershme. E djathta e ka të domosdoshme të ndërtojë në radhë të dytë një koalicion vlerash, ku idetë tona krijojnë shpresë dhe besim. Nuk është e mjaftueshme që të tregojmë vetëm se sa i keq është Edi Rama. Është e domosdoshme të tregojmë që ne kemi forcën për të bashkuar shqiptarët kudo që janë, për t`a bërë Shqipërinë Europiane, për të krijuar shanse dhe mundësi të reja.
Po kërkojmë reciprocitet, respekt, vlerësim të njerëzve të Partisë Republikane, të historisë së Partisë Republikane, të peshës së Partisë Republikane dhe njëkohësisht të ideve të Partisë Republikane, sepse besojmë tek këto ide dhe këto vlera.
Kjo është trupa elektorale e Partisë Republikane. Këta do të jenë kandidatët, ju do të jeni kandidatët, në çdo qendër votimi, për të punuar të gjithë së bashku”, deklaroi Mediu.
/Gazetareforma.com/
