Kanë kaluar rreth dy javë që nga miratimi i ligjit “Anti-KÇK” dhe nxjerrja në terren e forcës operacionale OFL, e cila ka shkaktuar pafund polemika e diskutime.
Ditën e sotme u bë me dije se janë sekuestruar 10 automjete në Vlorë, 2 prej të cilave i përkisnin të ndjerit Edison Harizaj, i ekzekutuar 1 vit më parë në Durrës.
Së fundmi, Ministrja e Shtetit për Marrëdhëniet me Parlamentin, Elisa Spiropali ka qenë e ftuar në “Zonë e Lirë”, ku ka folur rreth aktulitetit politik.
Ndër të tjera, Spiropali ka folur edhe rreth OFL-së dhe është munduar të jap një ‘këshillë’ për subjektet KÇK, duke u shprehur se të gjithë ata që kanë burime të paligjshme të ardhurash të futen nëpër vrima e të mos dalin në rrugë.
“OFL-ja është një nisje e mirë, është gjysma e punës. Të gjitha nismat synojnë të ngushtojnë rrugët e krimit. Ata që janë krimi edhe fshehin pasuritë të mos na dalin nëpër rrugë, të paktën të shkojnë të fshihen nëpër vrima. Të mos e bëjnë hapur. Ne u themi, futuni nëpër vrima, në rast se keni këto burime të paligjshme dhe ne do t’iu ndjekim aty, do t’u hetojmë e do t’u fusim brenda me prova, por këto pasuri nuk do t’i gëzoni. Ne do t’u hetojmë deri në fund. Jo t’i bëni karshillik një të riu a të reje,”– tha Spiropali.
Po ashtu, ministrja ka folur edhe rreth sjelljes së shumëpërfolur të Edi Ramës gjatë mbrëmjes së djeshme në “Opinion”.
Sikundër, mund të mendohet ajo i ka dalë në mbrojtje kryeministrit, teksa i ka quajtur gazetarët “të paedukatë”.
“Sa më shumë të dalin ata gazetarët në studio dhe i mungojnë respekt në mënyrë spektakolare, fiton përkrahje. Gazetarë që nuk ia kanë haberin fare etikës për faktin se kanë përballë kryeministrin e vendit. Ose të lexojnë ligjet, ose të kenë etik. Ky që qenka diktatori sipas jush i lejoka të gjitha këto. Të gjithë këta ne i kemi kundër, nga mediat dhe ne jemi pushteti totalitar. A ka qenë boshti i politikës së tyre boshti kundër krimit? A është kala presidenca që duhet pushtuar? Ne kemi vetëm ato që na takojnë, ne kemi qeverinë dhe shumicën në parlament. Opozita ka zgjedhur të iki, kërkoi të shkatërronte sistemin demokratik.”
Kujtojmë se OFL ka në dorë listën e parë me 150 subjekte, nga 250 në total që pritet të skanohen nga njësia speciale.
OFL (Operacioni Forca e Ligjit), është Njësia Speciale që del në terren për të zbatuar në bashkëpunim me SPAK-un, Ligjin Special të sapo miratuar për masat pasurore ndaj personave të dënuar ose akuzuar për krim të organizuar.
