Provimi i “Letërsisë dhe Gjuhës Shqipe” të Maturës Shtetërore ka ngjallur reagime të shumta në vendin tonë.
Meme pafund “pushtuan” rrjetin me pyetje se “çfarë bënte Turi se u hoqi trurin”.
Sipas nxënësve, pyetje që nuk kishin lidhje me kurrikulat e tyre janë bërë në testim dhe kjo ka sjellë revoltimin e maturantëve, por jo vetëm.
Maturantët janë më të vendosur se kurrë se nuk do të ndalen së protestuari deri në plotësimin e kërkesave të tyre.
Ditën e sotme ata kanë paralajmëruar sërish protestë në orën 11:00, përpara Ministrisë së Arsimit.
Gjithashtu mësohet se protestë do të ketë edhe në qytete të tjera, ku maturantët janë organizuar përmes rrjeteve sociale.
Protesta ka nisur pas testimit të Gjuhë-Letërsisë, të cilin maturantët e quajnë një provim absurd, jashtë progaramit dhe me pyetje të pakuptimta.
Edhe akademiku Artan Fuga u dha të drejtë maturantëve të protestojnë e të revoltohen, pasi në vendin e tyre maturantët e studentët trajtohen si kavie eksperimenti dhe ku diplomat e tyre nuk kanë kurrfarë vlere.
Edhe Aleksia Peleshi, vajza e deputetit të PS dhe ish-zv.kryeministrit Niko Peleshi i doli kundër ministres së Arsimit Besa Shahini.
Me anë të disa statuseve në Insta Story, Peleshi i bën thirrje ministres që të mos i trajtojë maturantët si qenie eksperimentale por t’u japë vërtet atë që meritojnë dhe siç u takon në bazë të situatave të vështira që kanë kaluar.
Aleksia shkruan se duke qenë se përballuan tërmetin dhe pandeminë e koronavirusit, priste që të anuloheshin provimet e maturës, njësoj siç u bënë në shtetet europiane, por edhe pse nuk u bë kjo, priste që të paktën, të kishin pyetje më të thjeshta.
Kujtojmë se ditën e djeshme, pas më shumë se 2 orë proteste, disa nxënës u futën në ambjentet e Ministrisë së Arsimit për të dorëzuar një draft prej 10 pikash të hartuar prej tyre dhe ekspertë të fushës.
Në draft tregohen gabimet në hartimin e tezës së Gjuhë – Letërsisë.
Maturantët kërkojnë gjithashtu që të mos shkruajnë emrat e tyre në tezat e provimit.
Nëse nuk ka një përgjigje konkrete, ata u shprehën të gatshëm të bojkotojnë provimin e radhës të maturës.
