Pensionistët shqiptarë rezultojnë më të palumturit në raport me grupet e tjera të popullsisë, sipas Indeksit Global të Lumturisë 2024.
Shqipëria renditet në vendin e 100 nga 143 vende për lumturinë e grup-moshës 60+, duke lënë pas kryesisht vende të Afrikës.
Në indeksin e përgjithshëm, që përfshin të gjitha grup-moshat, Shqipëria u pozicionua në vendin e 87.
Pensionistët shqiptarë janë më të palumtur edhe krahasuar me të rinjtë dhe moshën e mesme, me nivelin e lumturisë që ka rënë ndjeshëm që nga viti 2006.
Raporti thekson se pabarazia e mirëqenies ndikon më shumë në lumturinë e përgjithshme sesa pabarazia e të ardhurave.
Për grup-moshën 60+, mungesa e aksesit në shërbime bazë si kujdesi shëndetësor, të ardhurat dhe mbështetja sociale, përkeqëson gjendjen e tyre emocionale dhe fizike.
Në Shqipëri, të ardhurat e ulëta për pensionistët mbeten një sfidë madhore, pasi shumica jetojnë nën kufirin relativ të varfërisë me më pak se 6.7 USD në ditë.
Kjo situatë e renditi Shqipërinë ndër vendet më të palumtura në Evropë për vitin 2024, duke u pozicionuar mbi vetëm Turqinë.
Në përgjithësi, edhe pse studimet sugjerojnë se me moshën njerëzit mund të fokusohen më shumë tek aspektet pozitive të jetës, problemet e mprehta socio-ekonomike dhe shëndetësore i pengojnë pensionistët shqiptarë të përjetojnë këtë përmirësim./ Monitor
