Gjykata e Tiranës ka lënë burg 5 personat e arrestuar për pengmarrjen dhe vrasjen e Jan Prengës.
Përpara trupit gjykues dolën ditën e sotme Bajram Hajri, Leonard Hajri, Olsi Turja, Elton Hajri dhe Festim Bexhdili.
Katër të parët akuzohen për rrëmbimin e 49-vjeçarit, ndërsa Festim Bexhdili, i cili u arrestua në Kavajë, dyshohet se ka fshehur dhe asgjesuar trupin e viktimës, i cili nuk është gjetur ende.
Arbër Hoxha, avokati i Elton Hajrit, ka mohuar akuzat ndaj të pandehurve.
Ndërsa vetë Eltoni, deklaroi para gjyqtarëve, se nuk e përdor më furgonin, me të cilin mendohet se është transportuar Prenga.
Ndërkohë, Bexhdili, i cili akuzohet për asgjesimin e trupit, kur është pyetur nga gjykatësit për punën që bënë është përgjigjur: “Hiç ja merrem me punë”.
Babai i Elton Hajrit, ka deklaruar se djali i tij është i pafajshëm dhe prej tre vitesh nuk punonte në resortin ku mendohet se do mbahej peng Prenga.
Ai ka shtuar, se nëse prokuroria provon të kundërtën, do të kërkojë falje publike.
Pista më e fortë e hetuesve është ajo e pazareve të drogës.
Dyshohet se vëllai i viktimës, Astrit Prenga, i cili ndodhet në burg në Angli, duhet t’u dorëzonte tre grupeve kriminale, nga Shijaku, Vlora dhe Shkodra, një sasi prej 240 kg kokainë.
Hetuesit vunë në përgjim familjarët e tij, të cilëve vëllai i viktimës, i kishte thënë të mos komunikonin me policinë.
Familjarët e viktimës kishin kontaktuar me një pajtues gjaqesh në Shkodër, por ujdia u prish në momentin që forcat RENEA mësynë në Shijak tek kompleksi “Golden”, ku mendohet se do të mbahej peng viktima.
