Pedagogia Iris Luarasi ka reaguar ashpër mbrëmjen e djeshme në lidhje me ngjarjen e rëndë të ndodhur në Babrru, ku roja i shkollës ka përdhunuar për tre vite një 15-vjeçare.
Nga opinioni “Open”, Luarasi është shprehur se pedofilët duhet të kastrohen.
Ajo shtoi se kjo mund të bëhet me një referendum, ku qytetarët të firmosin pasi kjo mund të jetë e vetmja frikë e pedofilëve.
Po ashtu pedagogja ka kritikuar edhe shoqërinë shqiptare e cila nuk denoncon ngjarjet në polici, por u bën karshillëk fenomeneve të tilla.
“Në Shqipëri për fat edhe pse jemi në 2020-tën, vijon të jetë kultura e viktimizmit të mëtejshëm për ata që janë viktima.
Pasi viktima është abuzuar seksualisht nga një pedofil 65-vjeçar, dhe kjo është një nga arsyet pse unë kam qenë pro për kastrimin e këtyre pedofilëve.
Nuk e di si mund të bëhej kjo gjë, ndoshta me një referendum në Shqipëri që të mblidhen firma nga njerëzit, pasi ndoshta kjo mund të jetë frika e tyre.
Po shohim kaq shumë raste në këtë shoqëri kaq të vogël si kjo e jona. Si mund të mbledhim firma nga populli që të bëhej kjo gjë.
Shoqëria jonë se merr në konsideratë që kjo është një fëmijë njëherë.
Si mund të logjikosh ti për gjykimin që mund të ketë një fëmijë kur shantazhohet e abuzohet nga dikush që mund të ishte gjyshi i saj.
Kjo është një nga gjërat që unë do kërkoja se si mund të kastronim këta pedofilë”, u shpreh Luarasi.
