Partia Demokratike ka kërkuar përjashtimin e shtatë gjyqtareve të Kolegjit Zgjedhor, që sipas saj kanë refuzuar transparencën e zgjedhjeve në tre qarqet e vendit. Me anë të një reagimi publik Partia Demokratike ka kërkuar përjashtimin e 7 nga 8 gjyqtarët. Gjithashtu PD-ja thekson se këta gjqtarë nuk garantojnë paanshmëri në gjykim për 6 paditë e tjera. Sipas PD-së me vendimin e dhënë deri më tani këta gjyqtarë kanë mbështetur “masakrën zgjedhore” të 25 prillit.
“Kërkojmë përjashtimin e 7 prej 8 gjyqtarëve e Kolegjit Zgjedhor, që kanë rrëzuar paditë për Gjirokastrën, Vlorën dhe Beratin. Me vendimet e dhëna deri tani, këta gjyqtarë, njësoj si komisionerët politikë të KAS, refuzojnë transparencën mbi masakrën zgjedhore te 25 prillit. Refuzimi i i kërkesave të PD për marrjen zyrtarisht të provave i vendos këta gjyqtarë në pamundësi për të gjykuar me paanësi 6 kërkesat e tjera të ngjashme te PD për blerjen e votës dhe deformimin e rezultatit të zgjedhjeve përmes përdorimit të shtetit në funksion të PS.
Në kërkesën për zëvendësimin e 7 gjyqtarëve të Kolegjit Zgjedhor, PD argumenton se duke qenë se këta gjyqtarë e kanë shprehur tashmë mendimin e tyre kundër kërkesave të PD për zgjedhjet, ata do të vazhdojnë me të njëjtin qëndrim. Kjo bën që vendimet e tyre për 6 paditë e tjera të PD të jenë të paracaktuara, në shkelje të Kushtetutës dhe Kodit Zgjedhor për një proces të paanshëm. PD vlerëson se vazhdimi i ankimimeve me të njëjtën trupë zgjedhore, e cila është shprehur 3 herë me radhë kundër kërkesës së PD për transparencën e zgjedhjeve, është në shkelje të parimeve themelore të Gjykatës së Strasburgut për dhënien e drejtësisë.”, thuhet në reagimin e PD-së.
