Partia Demokratike ka vijuar me denoncimet për kryebashkiakët socialistë.
Sekretari i Përgjithshëm i PD, Gazment Bardhi është shprehur para mediave, se PD i ka kërkuar Prokurorisë së Përgjithshme verifikimin e të kaluarës kriminale të kryebashkiakut të Matit, Agron Malaj.
Ky i fundit ishte pjesë e grupit të zjarrit më 21 janar, kur u vranë 4 persona në bulevard.
Sipas PD, Malaj është dënuar me vendim të formës së prerë për armëmbajtje pa leje dhe i ndalohet kandidimi për një funksion publik.
Demokratët kërkojnë verifikimin pa vonesë dhe heqjen e mandatit për Malajn.
“Sot PD i ka kërkuar zyrtarisht prokurorisë verifikimin e të kaluarës kriminale të Edi Ramës së Matit. Agron Malaj i dënuar me vendim gjyqësor të formës së prerë për armëmbajtje pa leje dhe i ndalohet kandidimi përjetë për një funksion publik. PD i kërkon Prokurorisë së Përgjithshme dhe më pas KQZ të veprojë pa asnjë vonesë për administrimin e vendimit zyrtar të gjykatës së Matit dhe heqjen e mandatit për kreun e bashkisë së Matit Agron Malaj”, tha Bardhi.
