Partia Demokratike ka çuar të tjera dokumente në SPAK për aferën më të madhe, atë të inceneratorëve.
Në një deklaratë për mediat nga selia blu, anëtarja e Këshillit Kombëtar të PD-së, Silvi Bardhi, denoncoi se banda e inceneratorëve blen me shuma të majme sulmuesit mediatikë dhe organizata fantazmë.
Bardhi ndër të tjera denoncoi se Abedin Hitaj, babai i Arbër Hitajt, rezulton i punësuar pranë inceneratorit të Tiranës dhe njëkohësisht është ortaku i vetëm i kompanisë “Hawk Security”, duke shërbyer si prestanome për Mirel Mërtirin dhe Klodian Zoton.
“Nga të dhënat që Partia Demokratike disponon, në një e-mail të datës 25 qershor 2021, Denisa Tollkuçi informon Stela Gugalljën dhe Klodian Zoton, për të gjitha veprimet e ndjekura për kompanitë e tyre, ku bën pjesë edhe kompania “Hawk Security”, siç e shihni dhe në foton në ekran. Kjo kompani, referuar të dhënave zyrtare të QKB-së, rezulton se është themeluar fiktivisht në emër të Abedin Hitajt”, u shpreh Bardhi.
Sipas saj, Abedin Hitaj, është njëkohësisht dhe roje objekti pranë inceneratorit Tiranë, ku merr rrogën e 9-të më të lartë në këtë koncension, plot 1 mijë e 600 euro në muaj.
Deklarata e plotë:
Protesta e qytetarëve të lirë kundër korrupsionit dhe vjedhjes përballë Bashkisë Tiranë, me sa duket ka tronditur thellësisht grupin e strukturuar kriminal të inceneratorit Tiranë dhe bandës “5D”.
Ky fakt u vu re më së shumti pas protestës së 9-të të organizuar ditën e djeshme. Nuk përbën aspak habi, që dje pati dy reagime qesharake në mbrojtje të bandës së inceneratorit të Tiranës dhe bandës “5D”, duke kërkuar arrestimin e protestuesve dhe jo të hajdutëve.
Jam këtu sot për të denoncuar publikisht një organizatë të vetëquajtur jofitimprurëse që pretendon të ketë në fokus mbrojtjen e gazetarëve, por në të vërtetë është në shërbim total të mbrojtjes së hajdutëve të inceneratorit të
Tiranës.
Shoqata e gazetarëve “AEJ Albania”, drejtohet nga Arbër Hitaj. Ky i fundit ka dy arsye madhore për të ofruar këtë shërbim. E para, ky reagim bëhet për të mbrojtur interesat korruptive dhe klienteliste të punëdhënësit Carlo Bollino, i kallëzuar penalisht nga Partia Demokratike për grabitjen e truallit mbi të cilin ka ngritur televizionin e tij dhe faktin se financohet me paratë e inceneratorit Tiranë.
Arsyeja e dytë është se Abedin Hitaj, babai i Arbër Hitajt, rezulton i punësuar pranë inceneratorit të Tiranës dhe njëkohësisht është ortaku i vetëm i kompanisë “Hawk Security”, duke shërbyer si prestanome për Mirel Mërtirin dhe Klodian Zoton.
Nga të dhënat që Partia Demokratike disponon, në një e-mail të datës 25 qershor 2021, Denisa Tollkuçi informon Stela Gugallen dhe Klodian Zoton, për të gjitha veprimet e ndjekura për kompanitë e tyre, ku bën pjesë edhe kompania “Hawk Security”, siç e shihni dhe në foton në ekran.
Kjo kompani, referuar të dhënave zyrtare të QKB-së, rezulton se është themeluar fiktivisht në emër të Abedin Hitajt.
Ndërkohë “pronari” Abedin Hitaj, është njëkohësisht dhe roje objekti pranë inceneratorit Tiranë, ku merr rrogën e 9-të më të lartë në këtë koncension, plot 1 mijë e 600 euro në muaj.
Të nderuar qytetarë,
Partia Demokratike ka një pyetje të thjeshtë për ju. Çfarë objekti ruan shtetasi Abedin Hitaj, i cili paguhet plot 1 mijë e 600 euro në muaj??? Kjo mbetet një pyetje retorike, pasi nuk ka shqiptar dhe ndërkombëtar që nuk e di se incenerator NUK KA.
Në mbarë botën e civilizuar, roje e një objekti që nuk ekziston, i cili paguhet me 1 mijë e 600 euro në muaj, vetëm babi i Arbër Hitajt mund të jetë.
Ky shtetas është thjesht një prestanome i inceneratorit të Tiranës, e jo më kot i biri i tij, Presidenti i Organizatës anonime Arber Hitaj, bën thirrje për arrestimin e protestuesve të cilët kërkojnë dorëheqjen e hajdutit të shekullit Erion Veliaj.
Partia Demokratike është në mbështetje të qytetarëve dhe kundër vjedhjes që po u bëhet atyre ditën për diell.
Partia Demokratike respekton dhe mbron çdo gazetar, i cili ndjek në kushte të paprecedenta çdo ngjarje në Shqipëri. Puna dhe pozicioni i tyre do të jetë nën vëmendjen tonë të veçantë, pasi si kurrë ndonjeherë media nuk ka qenë më e frustruar dhe më e dhunuar nga banda e pushtetit.
