Miratohen drejtuesit e Komisioneve të Përhershme Parlamentare, Sekretariati dhe Byroja e Kuvendit.
Në seancën parlamentare të pasdites në Kuvend janë votuar edhe kryetarët e Komisioneve të Përhershme Parlamentare. Pesë prej komisioneve do të drejtohen nga Partia Socialiste, ndërsa tre të tilla do të drejtohen nga Partia Demokratike. Koltilda Bushka e PS do të jetë kryetare e Komisionit të ligjeve. Nga PS për Komisionit e Jashtëm do të jetë Mimi Kodheli, ndërsa Eduard Shalsi do të jetë në krye të Komisionit të Ekonomisë. Nga Partia Demokratike, Jorida Tabaku do të jetë kryetare e Komisionit për Integrimin Europian, ndërsa Albana Vokshi do të jetë kryetare e Komisionit për Shëndetësinë. Kryetar i Komisionit për Edukimin dhe Median do të jetë Agron Gjekmarkaj.
Drejtuesit e Komisioneve të Përhershme Parlamentare vijojnë si më poshtë:
Klotilda Bushka drejtuesja e Komisionit të Ligjeve (PS)
Nasip Naço kreu i Komisionit të Sigurisë (PS)
Mimi Kodheli kryetare e Komisionit të Jashtëm (PS)
Eduard Shalsi, kryetar i Komisionit të Ekonomisë (PS)
Arben Pëllumbi, kryetar i Komisionit të Veprimtarisë Prodhuese (PS)
Jorida Tabaku, kryetare e Komisionit për Integrimin Europian (PD)
Albana Vokshi, kryetare e Komisionit për Shëndetësinë (PD)
Agron Gjekmarkaj, kryetar i Komisionit për Edukimin dhe Median (PD)
Nënkryetari i LSI, Petrit Vasili deklaroi se partia e tij nuk ka qenë njoftuar nga Kuvendi për të thënë praninë dhe preferencën në komisione.
”Nuk kemi pasur asnjë komunikim nga Kuvendi dhe kjo e ka bërë të pamundur të deklarojmë praninë dhe preferencën tonë në komisionet përkatëse. Ose të dalim pak minuta dhe hajde ta zgjidhim së bashku, sepse ndryshe do t’i mbetet një momenti tjetër dhe kjo jo për shkakun tonë, por për shkak të Kuvendit.”- tha Vasili.
PD dhe PS ranë dakord me Vasilin duke kërkuar edhe kohë që LSI të mund të bënte propozimet.
