Akoma vazhdojnë negociatat e PD-së me Republikanë dhe PDIU-në. “Shumë shpejt do të keni njoftimin zyrtar nga grupi negociator”, deklaroi kryetari i partisë Demokratike, Lulzim Basha, në lidhje me bisedimet me aleatët për daljen në listë të përbashkët në zgjedhjet e 25 prillit.
Këtë deklaratë kreu i PD e bëri pak minuta më parë teksa po hynte në selinë blu, ku po zhvillohen negociatat, sidomos me Partinë Republikane të Fatmir Mediut dhe PDIU-në e Shpëtim Idrizit, të cilat synojnë më shumë se një mandat të sigurt. Grupi negociator i PD është i përbërë nga Edi Paloka, Gazment Bardhi dhe Alfred Rushaj.
Negociatat mes republikanëve dhe Partisë Demokratike kanë ngecur në diskutimin e shifrave sesa kandidatë të PR duhet të përfshihen në listën zgjedhore. Megjithatë Fatmir Mediu është shprehur se nuk tërhiqet nga kërkesa për një vlerësim sa më të drejtë të peshës elektorale të partisë që drejton.
Deri tani PD ka mbyllur marrëveshjen me 3 parti aleate, dhe i ka premtuar vende të sigurta në lista, Agron Dukës në Durrës, Nard Ndokës në Shkodër dhe Dashamir Shehit në Tiranë. Por mandate të sigurt në Qarkun e Tiranës synojnë edhe aleatët e tjerë Mediu i Republikanëve dhe Shpëtim Idrizi i PDIU, pretendimet e të cilëve janë për më shumë se 1 kandidat.
I pyetur se kur do të dalë opozita e bashkuar me një vendim final për listat, kreu i PD-së Lulzim Basha tha se përtej kalkulimeve dhe renditjes së të gjithë kandidatëve, 25 prilli do të jetë dita e ndryshimit.
“Kur të shpallen listat e deputetëve gjithçka do të jetë e qartë. Përtej kalkulimeve një gjë është e qartë si drita e diellit 25 prillit do të jetë dita e ndryshimit të madh”, tha Basha.
/Gazetareforma.com/
