Nga Sonila Meço
E vetmja gjë, që ende nuk e tres dot me gjithë sforcimin e jashtëzakonshëm për të mirkuptuar njeriun e nënshtruar autokracisë është pranimi i abuzimit me jetën dhe shëndetin e tij dhe të shtrenjtëve të vet nga pushteti.
Ka dy vite Osman Stafa, që u është bërë “kishë” për t’u falur gjithë hallemëdhenjve me shëndetin dhe të nëpërkëmburve nga sistemi i shëndetësisë “falas”; ka dhjetra padi të depozituara në SPAK nga opozita për vrasjet “me dashje” nga sistemi e me emra konkretë; dëgjoj e dëshmoj çdo ditë si gazetare e njeri tmerrin e familjeve shqiptare në përballjen me sëmundje gjithnjë në rritje dhe shërbimin e munguar në aparatura, laboratorë, barna, me gjithë stërmundimin e mjekëve të ndershëm e punëmbaruar, teksa shtohen malet e borxheve për trajtime jashtë vendi a në klinika private.
Siç shoh të tjerë, me sëmundje e patologji, që nuk përzgjedhin statuset e njerëzve, që të paktën ia dalin të paguajnë pa zor trajtimet në klinikat më të mira të botës, ndërsa bashkatdhetarët e vet kthehen me pacientin me vete në shtëpi, sepse spitali publik nuk ka si ta zgjidhë hallin e fondeve të munguara, që i gëzojnë një grusht të pashpirtësh, që bëjnë biznes mbi trupin e shëndetin e fëmijëve e të shtrenjtëve të shqiptarëve.
19 milionë euro i merr në vit sterilizimi, ndërsa me 16 milionë euro mund të pajiseshin gjithë spitalet me aparatura diagnostikuese të sëmundjeve të rënda. Me 20 milionë euro tereziset onkologjiku për mos ta lënë në dorë të “llotarisë” se si do shpërndahen 18 doza kemio për 32 gra. Kur trefishin e kësaj vlere e gëlltiti 5D, 200 fishin inceneratori, që nuk ekziston.
Dhe mbi të gjitha, kur po shqiptari i gjorë paguan edhe shkakun e sëmundjeve të veta, përfshi ato terminale, që nga ndërtimet, ndotja e plehrat e pasistemuara, barnat e skaduara, ushqimet e pakontrolluara, importet e moskundit dhe mbetjet toksike, që helmojnë tokë, ajër e ujra.
Pra sot ne financojmë vdekjen dhe lëngimin tonë, duke lejuar autokracinë të na ngopë me propagandë e tallava.
Dhe patjetër, me refrenin absurd “fajin e ka opozita”…po mirë e pyetët SPAK-un ç’po bën me denoncimet emër për emër e provë më provë, që i bën kjo opozitë “e lodhur”? Apo t’i biem një herë opozitës, që pasi iu bë e pabëra me ndihmë edhe ndërkombëtare, arriti të mbijetoje e të nxjerrë edhe program për shëndetësinë me zgjidhje konkrete fondesh e infrastrukture?! Apo më mirë fare, i fusim një “këta të opozitës” nuk janë kurrkund dhe le të vijojmë me këta “vrasësit” e vërtetuar derisa mos ketë mbetur më as popull….
Opozitë sot nuk është vetëm një parti, opozita sot është filozofia më elementare: do vijosh të financosh me mundin tënd e fatin e fëmijëve të tu “vdekjen”, “ikjen” e “rrënimin”, apo do t’i japësh fund degradimit. Atij degradimi, që e përthith po njëlloj me të njëjtin ajër, ujë e energji që ndajmë së bashku, sado afër pushtetit, privilegjit e statusit, sado larg tyre.
