Një urdhër gjykate i Zvicrës, i publikuar së fundmi, ka nxjerrë në pah aktivitete të krimit të organizuar në këtë vend.
Policia ka monitoruar një agjenci udhëtimesh në Lucern, të dyshuar për shërbimin si pikë transporti për paratë e drogës.
Gjatë një periudhe njëvjeçare, janë regjistruar më shumë se 750 vizita nga korrierët e dyshuar të drogës.
Agjencia e udhëtimeve, e specializuar për udhëtime në Ballkan, thuhet se ka shërbyer për vite me radhë si një pikë transporti për miliona nga tregtia e drogës.
Pas një operacioni policor në shtator të vitit të kaluar, u arrestuan pronari i agjencisë, djemtë e tij dhe një punonjës i vjetër. Policia kishte vënë në shënjestër agjencinë që nga viti 2022, duke e mbikëqyrur për shkak të afërsisë me stacionin e policisë së Lucernit.
Hetimet zbuluan se agjencia ishte e lidhur me pastrimin e parave dhe transportimin e këtyre parave në Shqipëri, duke përdorur sistemin “haëala”.
Gjatë operacionit, më shumë se 40 korrierë droge, të dyshuar për lidhje me agjencinë, u arrestuan. Ndërkohë, rrjeti i drogës thuhet të kontrollohej nga individë në Kosovë dhe Shqipëri.
Një nga personat e arrestuar, Tarik Berisha, është përmendur si një nga aktorët kryesorë në Zvicër. Ai është përgjuar dhe ka shprehur besimin se rrjeti i tij nuk do të zbulohej kurrë nga policia.
Agjencia e udhëtimeve është mbyllur këtë javë dhe nuk është përgjigjur ndaj akuzave. Avokati i të dyshuarit për pastrim parash ka njoftuar se klienti i tij nuk dëshiron të flasë me mediat.
Pas arrestimeve, Zyra e Prokurorit të Përgjithshëm të Zvicrës ka kërkuar që të dërgohen në paraburgim personat e arrestuar, duke i akuzuar për përfshirje në një organizatë kriminale dhe pastrim parash.
Të gjithë personat janë prezumuar të pafajshëm deri në një vendim përfundimtar.
