Pas situatës problematike të zjarreve, gjendja paraqitet tashmë ndryshe në Kukës, ku kanë filluar reshjet e shiut, të cilat kanë shuar edhe vatrat e mbetura aktive. Intensiteti i reshjeve ka qenë i dendur në zonën ku ishin zjarret. Shiu vijon për më shumë se një orë, jo vetëm në Kukës, por edhe në Has, Tropojë e Pukë. Kështu, zjarret janë shuar dhe pyjet që po digjeshin çdo ditë fatmirësisht kanë shpëtuar.
Prej disa ditësh në zonën e Kukësit situate e zjarreve ka qenë kritke, me flakët në Majën e Rrunës që u vunë nën kontroll me shumë vështirësi. Edhe më problematike ka qenë gjendja mbi Tunelin e Kalimashit. Era e fortë dhe terreni favorizuan në përhapjen e flakëve, teksa ndërhyrja ishte e vështirë.
Në ndihmë të Forcave të Armatosura të Shqipërisë dhe Forcave Zjarrfikëse erdhën edhe Forcat e Sigurisë së Kosovës, që ndihmuan në shuarjen të zjarrit. Ndërhyrja e helikopterit ditën e sotme dhe “një dorë nga natyra” sollën shuarjen përfundimtare të flakëve që nuk ndaleshin prej ditësh.
Ditën e sotme gjithashtu u njoftua se janë shuar edhe flakët në gadishullin e Karaburunit, që vazhdonin për ditë me radhë, madje në disa raste duke rrezikuar edhe Parkun Kombëtar të Llogarasë.
