Pas dy ngjarjeve të bujshme të ditëve të fundit (kujto: vrasjen e biznesmenit në Rrëshen dhe vrasjen e një gruaje nga kunati në Paskuqan), Ministria e Brendshme ka marrë disa masa të papritura.
Ministri Sandër Lleshaj i ka kërkuar policisë mos të ketë asnjë komunikim me mediat.
Ai u ka dërguar atyre një mesazh krerëve të trupave blu, ku i urdhëron të mos lejojnë daljen e materialeve hetimore për ngjarje të ndryshme kriminale.
Ndër të tjera në udhër thuhet se këto materiale përbëjnë sekret hetimor dhe po skandalizojnë opinion.
“Përshëndetje të nderuar shefa Komisariatesh dhe sektorësh. Marr shkas nga dalja në media të materialeve procedurale si në rastin e vrasjes në Rrëshen dhe vrasjes në Paskuqan ku dalin detaje të cilat jo vetëm që bëjnë sekret hetimor po skandalizojnë opinionin duke i interpretuar çdo farë personi.
Ju porosis:
Asnjë komunikim me mediat për asnjë lloj argumentimi.
Pasqyrimi i punës suaj do të bëhet nëpërmjet zëdhënësit të drejtorisë dhe Drejtorisë së Përgjithshme.
Në çdo rast që do të konstatoj do të filloj pa hezitim ecurinë e rëndë disiplinore ndaj jush. Me të njëjtin shqetësim përcilleni të vartësit tuaj këtë mesazh.
Nuk dua justifikime për daljen e tyre por ju porosis të jeni të vëmendshëm për ecurinë. Konfirmoni”, thuhet në mesazhin e Ministrisë së Brendshmje.”
Kastriot Reçi, biznesmeni nga Rrësheni, u ekzekutua më 7 janar para lokalit të tij.
Ndërsa 2 ditë më vonë në Paskuqan, më 9 janar, Erdet Çapoku vrau nusen e vëllait, 35-vjeçaren, Enkeleda Çapoku.
