Vetëm pak ditë pas bllokimit të një sasie specash nga Divjaka, autoritetet kroate kanë ndaluar sërish një tjetër produkt shqiptar në kufi. Këtë herë bëhet fjalë për një ngarkesë me krem fistëkësh (pasta pistachio), e cila ka rezultuar e kontaminuar me nivele të larta të një toksine të rrezikshme për shëndetin.
Sipas të dhënave të publikuara në Sistemin Evropian të Alarmit për Ushqimin (RASFF), ngarkesa që vinte nga Shqipëria u ndalua në pikën kufitare të Kroacisë më 8 shtator. Analizat laboratorike zbuluan praninë e lartë të aflatoksinës, një substancë kancerogjene që mund të shkaktojë dëmtime serioze të mëlçisë dhe probleme të tjera shëndetësore në rast konsumimi.
Autoritetet kroate kanë ndërmarrë menjëherë masën e asgjësimit të produktit të ndaluar, për të shmangur rrezikun e përhapjes në treg. Më 3 tetor, njoftimi u publikua zyrtarisht në sistemin RASFF, duke vënë në dijeni të gjitha vendet anëtare të Bashkimit Europian që të verifikojnë nëse sasia e produktit është shpërndarë më tej në tregjet e tyre.
Ky është rasti i dytë brenda një jave që një ngarkesë me produkte shqiptare ndalohet në kufijtë e BE-së për shkelje të standardeve të sigurisë ushqimore, ndërkohë AKU dhe Ministria e Bujqësisë heshtin… Ngjarja ngre sërish shqetësime për mungesën e kontrollit dhe garancive cilësore në produktet që eksportohen nga Shqipëria drejt tregjeve europiane.
