Historitë shokuese kur personat në pozicione të larta kërkojnë para në këmbim të kryerjes së detyrës së tyre, nuk janë të pazakonta në vendin tonë.
Por rasti i gjyqtarit Roland Hysi ka tronditur të gjithë opinionin publik. Emisioni “Stop” bëri publik rrëfimin e një gruaje, të cilës iu kërkuan nga gjyqtari para dhe marrëdhënie seksuale, vetëm që të siguronte kujdestarinë e fëmijës së saj.
Në kamerën e fshehtë përfshihen disa gjyqtarë dhe psikologia Elona Meçani, e cila bën edhe rolin e sekseres. Denoncuesja tregon të gjitha sfidat që iu desh të kalonte për të marrë fëmijën e saj.
Gjyqtari i Fierit Roland Hysi i kërkon marrëdhënie seksuale për t’i dhënë kujdestarinë e fëmijës, si dhe gjithashtu zonja i jep psikologes 500 euro për Hysin, duke i premtuar edhe 500 euro të tjera në mbyllje të gjyqit.
Lidhur me këtë ngjarja reagoi ashpër edhe juristja e njohur shqiptare Eni Çobani, e cila shprehet se ndihet e turpëruar nga kjo situatë.
E indinjuar për gjestin e gjyqtarit, ajo u bënë thirrje të gjithë kolegëve të tij që të zbatojnë ligjin dhe jo të jenë në kërkim të parave.
“Sapo ndoqa një emisionin ku mesazhi ishte jo vetëm i rëndë, por ishte tronditës, i turpshëm i paprecedent me vinte turp nga vetja teksa ndiqja zërin që i dridhesh një gruaje, një nëne, që nuk kishte frikë nga ligji po nga individi, që ne të gjithë i kemi veshur veladonin e gjyqtarit dhe i kemi dhënë të drejtën të na gjykojë, por jo në emër të lekut, por të ligjit. Sot unë e para i kërkoj ndjesë shqiptarëve për këtë imoralitet të veshur me pushtet, që akoma nuk kanë mësuar nga jeta, jo nga librat, se ata s’dinë te lexojnë, që të kërkosh dashurinë e një gruaje duhet të jesh burrë dhe jo burrec nuk ka nevojë të jesh gjyqtar, që ajo të të dojë, po mjafton që ajo të ndjejë, por që të ndjesh nuk mjafton të jesh gjyqtar, se duhet te jesh njeri dhe njeri të bën geni dhe jo veladoni i zi.
Sot si pjesë e këtij sistemi i kërkoj Presidentit të Republikës, Prokurorit të Përgjithshëm, Kryetarit të KLGj-së të reagojnë ashpër që të kuptojmë ku jetojmë, ku punojmë, para kujt shkojmë e kërkojmë drejtësi, jepini një dritë shprese këtij populli që të kuptoj që ky vend do ndryshojë, do ndërgjegjësohet, do largojë me neveri këtë imoralitet të ulët e të paskrupullt të ca çapaçulëve, që kanë komplekse impotence dhe shfryjnë mbi gratë hallexhesha që ju bien këtyre përballë. Tolerance zero për këta te pafytyrë dhe imoral të neveritshëm do ju qëndrojmë përballë deri sa të ikin e mos kenë më kurajë të jenë pjesë e drejtësisë. Zotërinj gjyqtarë, prokurorë e kushdo tjetër, mos firmosni me dorën te xhepi, por me sytë te ligji, se fundi juaj do jetë ky turp i ferrshëm që s’ka më kthim mbrapa”, shkruan në statusin e saj Eni.
Nga ana tjetër KLGJ ka nxitur nisjen e verifikimit të plotë të ngjarjes nga strukturat përkatëse. Ndërsa Prokuroria e Krimeve të Rënda nisi një procedim penal për gjyqtarin nga Fieri, nën akuzën e “Korrupsionit pasiv”.
