Disa ditë më parë kreu i Partisë Demokratike, Lulzim Basha shkarkoi nga posti i nënkryetarit të Komisionit, Flamur Nokën, ndërsa ditën e sotme është bërë me dije se vendin e tij do ta zëjë Ferdindand Xhaferri.
Këtë vendim të PD-së e ka bërë të ditur kryeparlamentarja Lindita Nikolla, e ciola në mbledhjen e sotme parlamentare, e cila njoftoi votimin në fjalë. Sjellim në vëmendje se Noka u shkarkua nga Basha dy ditë më parë. Mësohet se arsyeja e këtij vendimi sipas PD-së është se; “është shndërrimi i mbledhjes së Kryesisë së Grupit në laborator të prodhimit të gënjeshtrave për të baltosur Kryetarin dhe Partinë Demokratike, duke sajuar diskutime apo qëndrime, të pathëna dhe të paqena”, ndërsa Basha ka paralajmëruar shkarkimin e tije dhe nga grupi parlamentar demokrat.
Kujtojmë se lajmi u bë i ditur në një njoftim për mediat nga Partia Demokratike, e cila bëri të ditur edhe arsyet e vendimit.
Deputeti demokrat, Flamur Noka në reagimin e tij pas shkarkimit ka thënë se Basha po bën përpjekjet e fundit para se të shkarkohet edhe vetë. I pyetur në lidhje me paralajmërimin e Bashës për ta përjashtuar nga grupi parlamentar, Noka tha se kur përjashtoi Berishën, lehtësisht mund të përjashtonte dhe atë.
Deputeti deklaroi se askush në botë nuk do e ndalojë të mbrojë partinë dhe vlerave, ndërsa Bashën e cilësoi pengmarrës që bën gjithçka për karrigen.
