Sa më shumë kohë kalon, aq më shumë rëndohet situata nga COVID-19, teksa deri tani janë shënuar 41, 237 viktima dhe 836, 894 të infektuar në 201 vende në të gjithë botën.
E vetmja formë mbrojtjeje deri tani ka qenë izolimi dhe distancimi social, ndonëse po bëhen përpjekje edhe për krijimin e vaksinës e cila do i jepte fund kësaj beteje me armikun e padukshëm.
Disa javë më parë SHBA nisi testimin e vaksinës kundër koronavirusit dhe një grup prej 45 vullnetarësh të shëndetshëm i janë nënshtruar injeksionin në Institutin Kërkimor “Kaiser Permanente”, në Seattle.
Sipas ekspertëve duhen shumë muaj për të ditur nëse kjo vaksinë, apo dhe të tjerat për të cilat po punohet, do të funksionojë.
Sakaq, prej muajsh Izraeli ka lajmëruar se po punojnë shumë për krijimin e një vaksine dhe më në fund ka nisur testimet tek brejtësit në laboratorin e mbrojtjes bio-kimike.
Kryeministria ka lajmëruar se Instituti për Kërkime Biologjik në Ministrinë e Mbrojtjes së Izraelit ka bërë një “përparim të rëndësishëm” në zhvillimin e një vaksine kundër COVID-19.
Sipas Reuters testet kanë filluar tashmë tek brejtësit, por nuk dihet ende se për çfarë lloji brejtësish bëhet fjalë, por mendohet se Instituti i Izraelit për Kërkime Biologjike ka punuar me projektet e armëve biologjike dhe kimike, gjë e cila as nuk është konfirmuar e as nuk është mohuar nga Izraeli.
Në një deklaratë të rrallë për mediat, shefi i inovacionit të IZKB, Eran Zahavy tha javën e kaluar se Instituti kishte zhvendosur tërë fokusin e tij te koronavirusi i ri, ndërsa shtoi se tre grupe po përpiqeshin të zhvillonin një vaksinë kundër sëmundjes COVID-19 që shkakton koronavirusi dhe të tjerët që kërkojnë trajtime të mundshme.
Deri më tani, në Izrael të infektuar nga koronavirusi rezultojnë 4,831 persona ndërsa numri i personave që kanë humbur jetën është 17.
