Mbrëmjen e sotme Këshilli Politik ka zhvilluar takimin e radhës në Pallatin e Kongreseve, teksa mësohet se palët janë dakordësuar për disa pika.
Palët kanë rënë dakord për praninë e Policisë në procesin zgjedhor, vendosjen e sistemit të monitorimit me kamera të gjitha qendrat e votimit dhe numërimit dhe për vendosjen e oficerëve të policisë në sallat e numërimit të votave.
Megjithatë, duket se maxhoranca dhe opozita kanë ende probleme të pazgjidhura, pasi nuk kanë rënë dakord për vendosjen e një ministri teknik 100 ditë para zgjedhjeve, si garanci për një proces të rregull zgjedhor.
Po ashtu, ka patur përplasje edhe për teknologjinë në zgjedhje, pasi maxhoranca nuk është dakord për identifikimin, votimin dhe numërimin elektronik.
Ambasadorja e Shteteve të Bashkuara të Amerikës në Tiranë, Yuri Kim, ka reaguar me shpejtësi pas mbledhjes 4-orëshe të Këshillit Politik për Reformën Zgjedhore.
Diplomatja amerikane reagoi në rrjetet sociale duke shprehur kënaqësinë se reforma po bën progres, teksa tha se i ka takuar të gjithë përfaqësuesit e palëve në ulëset e tryezës dhe ka besim se ata do të marrin vendime të zgjuara.
Në fund, Kim pati edhe një falenderim për Hajdarin, Gjiknurin, Bylykbashin dhe Vasilin.
“E lumtur të dëgjoj se Këshilli Politik për Reformën Zgjedhore ka bërë më shumë progres. Kam takuar të gjithë anëtarët dhe besoj se ata do të marrin vendime të zgjuara. Faleminderit që vendosët të ardhmen e Shqipërisë të parën!”, ka shkruar Kim.
Mbledhja e radhës do të zhvillohet nesër dhe mësohet se në tryezë do të diskutohet dhe për sistemin danez që është propozuar nga ambasada e SHBA në Tiranë.
Synimi i vendosur nga vetë palët politike për të përmbyllur reformën zgjedhore brenda 31 majit, por edhe rritja e presionit ndërkombëtar dhe sidomos SHBA që kjo reformë të mbyllet brenda muajit, ka intensifikuar takimet e Këshillit Politik, ku gjatë kësaj jave takimi i sotëm i pasdites është i dyti që po zhvillohet.
Përfaqësuesja e opozitës parlamentare në Këshillin Politik të reformës zgjedhore është Rudina Hajdari, përfaqësuesi i mazhorancës Damian Gjiknuri dhe përfaqësuesit e PD-LSI, Oerd Bylykbashi dhe Petrit Vasili.
Ditën e sotme ambasadorja Yuri Kim ka takuar një e nga një Damian Gjiknurin si përfaqësues i mazhorancës, Oert Bylykbashin dhe Petrit Vasilinsi përfaqësuesë të opozitës jashtëparlamentare, Rudina Hajdarin “zërin” e opozitës së re.
Kujtojmë se pak ditë më parë palët politike u dakordësun për 3 çështje; periudhë zgjedhore, kuotat gjinore dhe financimin e partive, ndërsa opozita theksoi se këto nuk janë çështjet më të rëndësishme.
Prezenca e OSBE-së në Shqipëri, ambasadori Bernd Borchardt, teksa reagoi sot, pohoi se po ndiqet me interes të veçantë përpjekjet e partive për kompromis për çështje të rëndësishme, që OSBE i ka vlerësuar si problematika për shumë vite.
