Masat e qeverisë kundër Coronavirusit kanë ecur paralelisht me përparimin e virusit në vendin tonë.
Ditën e hënë, me shënimin e dy rasteve të para në Shqipëri, kryeministri Rama njoftoi mbylljen e çdo institucioni arsimor dhe pezullimin e çdo aktiviteti publik.
Mesditën e djeshme numri i të infektuarve shkoi në 10, e menjëherë qeveria njoftoi se do të mbyllen të gjitha pub-et, diskot, palestrat dhe të gjitha aktivitetet që mbledhin njerëz, duke theksuar se nuk është ende koha që të mbyllen restorantet dhe lokalet, por se ato duhet të marrin masat që qytetarët të mos kenë kontakte.
Konfirmohen 2 rastet e para me Koronavirus në Shqipëri! Rama: “Mbyllen shkollat”
Po ashtu, Rama deklaroi se stafi mjekësor që po përballet me situatën do marrë një shpërblim prej 1000 eurosh, ndërsa, sanitarët dhe shoferët e autoambulancave do të kenë 500 euro plus në rrogën e tyre.
Mbledhja e qeverisë: Nga shpërblim prej 1 mijë eurosh për stafin mjekësor tek masat ekstreme
Sot gjendja u përkeqësua, teksa 73-vjeçarja e shtruar në spitalin e Durrësit ndërroi jetë, mirëpo, qytetarët nuk po ndërgjegjësohen dhe vijojnë të frekuentojnë masivisht resorantet, lokalet dhe vende të tjera publike.
Në këto kushte, kreu i qeverisë është shprehur se personat që vijnë nga Italia dhe Greqi dhe nuk respektojnë rregullat e vetëkarantinimit, do të gjobiten me 5 mijë euro, teksa paralajmëroi edhe ngritjen e postblloqeve nga policia dhe ushtria.
Pa kaluar një orë nga deklarata e Ramës, policia ushtarake ka zbarkuar në terren me qëllim evidentimi personave të ardhur nga zonat e prekura të cilët nuk vetë-karantinohen.
Në këtë video të publikuar nga Top Channel tregohet policia ushtarake që nisur patrullimin.
https://youtu.be/6mOgS5iJrV4
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
Deri tani në rang global janë shënuar 4,382 viktima dhe janë infektuar 121,739 persona.
