Ndonëse PD ka kundërshtuar fuqishëm paketën “Anti-KÇK”, duket se sot ka vendosur t’i drejtojë një ankesë.
Ish-deputeti Enkeleid Alibeaj u shpreh se sulmi kundër KÇK duhet të nisë nga Edmond Bego.
“Edi Rama paralajmëroi me bujë se sot do të niste goditja e madhe kundër krimit të organizuar, duke goditur pasuritë e paligjshme të tij. Asgjë nuk ka për të bërë përtej propagandës, sepse pushteti i Edi Ramës varet nga krimi i organizuar, nga trafikantët e dënuar për trafik ndërkombëtar droge, nga vrasësit dhe kriminelët më të rrezikshëm të vendit, që blejnë dhe sigurojnë vota për pushtetin e tij.
Në qeverinë e Edi Ramës krimi u bë pjesë e politikës. Kriminelët u bënë deputetë, u bënë kryebashkiakë. Në rastet kur ata nuk hynë në politikë drejtpërsëdrejti, kriminelët krijuan lidhjet me pushtetin e Edi Ramës dhe u bënë biznesmenë të fuqishëm, duke marrë fonde publike nga tenderat korruptive të qeverisë së tij.”
I menjëhershëm ka qenë reagimi i avokatit të Begos, Ardian Leka në televizionin News 24.
Ai u shpreh se PD nëse ka prova të shkojë në Prokurori.
Po ashtu, ai shprehet se pasuria e tij është verifikuar tre herë.
“Është verifikuar pasuria dhe aktiviteti i Begos, tre herë, pas akuzave të PD. Si duket PD dhe përfaqësuesit e saj nuk kanë me çfarë të merren dhe godasin Begon. Në asnjë rast, Edmond Bego dhe shoqëria që ai përfaqëson nuk ka asnjë tender të marrë nga ana e bizneseve, akuzat janë flluskë sapuni, verifikimet janë bërë nga Prokuroria dhe nuk ka rezultuar asgjë. Alibeaj duhet të ketë parasysh dhe ngjarjet që kanë ndodhur në Gjermani dhe që i ka njerëz të vetët, meqë ka merak ligjin anti-KÇK. Ai po sulmon tjerët për të mbrojtur njerëzit e vetë. Megjithatë, PD është e hapur t’i drejtohet drejtësisë për të gjitha pasuritë e Begës. Kjo është një politikë që nuk përballohet më, nuk mund të vazhdohet kështu”, u shpreh avokati Ardian Leka.
Por, PD vijoi më tej sumin e saj ndaj kryetarit të grupit parlamentar të PS.
Endri Hasa, akuzoi Taulant Ballën se fshihet pas avokatit të mikut të tij trafikant droge.
Ai shkruan në Facebook që Balla më mirë të dalë nga skuta luksove e ta mbrojë vetë Begon.
“Taulant Balla të mos fshihet pas avokatit të mikut të tij trafikant droge, por të dalë nga skuta e tij luksoze dhe ta mbrojë vetë Edmond Begon. Pasuria e mikut të Taulant Ballës duhet të jetë që sot objekt verifikimi nga ligji anti KÇK, pasi Edmond Bego është i dënuar për trafik ndërkombëtar droge.
Pas miqësisë me Taulant Ballën, Edmond Bego ka marrë mbi 14 milionë euro para publike në mënyrë të paligjshme.
1. A gjen dot Policia rrugën që të verifikojë mikun trafikant droge të Taulant Ballës? 2. A do të verifikojë edhe pushtetarët që po e mbështesin atë për të pastruar paratë e drogës me projektin 60 milion euro të zhvendosjes së Lumit Lana? Me propagandë bajate nuk mund të mbulohet dot e vërteta: KÇK nuk e lufton dot KÇK!
”, shkruan Endri Hasa.
Edmond Bego është një emër i njohur për drejtësinë vendase dhe atë të huaj.
Ai është shpallur fajtor për një listë të gjatë akuzash, përfshirë “prodhim dhe trafikim i paligjshëm i lëndëve narkotike, bërjen pjesë në një organizatë që ka për qëllim trafikimin e lëndëve narkotike, organizimin dhe drejtim i organizatave kriminale.’
Në 2018 Bego është akuzuar nga Partia Demokratike, se ka devijuar projekti te Unaza e Re, me qëllim që kompania e tij të ndërtojë një kompleks pallatesh.
Po ashtu, selia blu ka akuzuar biznesmenin se ka përfituar 14 mln euro nga tenderat publike, për shkak të njohjes familajare me kreun e grupit socialist Taulant Balla.
