Pas humbjes së arbitrazhit me biznesmenin italian Francesco Becchetti, që i kushtoi Shqipërisë rreth 130 milionë euro, qeveria shqiptare ka pësuar një tjetër humbje në një proces gjyqësor ndërkombëtar dhe rrezikon sekuestrimin e aseteve shtetërore me vlerë rreth 13 milionë dollarë.
Një gjykatë federale në Washington, D.C., në Shtetet e Bashkuara të Amerikës, ka vendosur në favor të kompanisë Omni Bridgeway, duke i dhënë të drejtën që të konfiskojë asetet që i përkasin qeverisë shqiptare për të zbatuar një vendim arbitrazhi që tashmë arrin vlerën rreth 13 milionë dollarë.
Sipas raportimeve të mediave amerikane, një gjyqtar federal në Washington, D.C. pranoi kërkesën e financuesit të proceseve gjyqësore Omni Bridgeway për të nisur procedurat e sekuestrimit të aseteve të shtetit shqiptar.
“Një gjyqtar federal në Washington, D.C., pranoi të lejojë financuesin e çështjeve gjyqësore Omni Bridgeway të sekuestrojë asetet që i përkasin qeverisë shqiptare, ndërsa kjo e fundit synon të zbatojë një vendim arbitrazhi që tani vlen rreth 13 milionë dollarë,” raportojnë mediat amerikane.
Ky vendim vjen pasi qeveria shqiptare humbi procesin e arbitrazhit, ndërsa për vite me radhë nuk e ka zbatuar vendimin për pagesën e detyrimit.
Vendimi fillestar i arbitrazhit kundër Shqipërisë është dhënë në vitin 2020 nga një gjykatë arbitrazhi në Zvicër. Megjithatë, moszbatimi i tij nga pala shqiptare çoi në ndërhyrjen e gjykatës amerikane, e cila tani ka hapur rrugën për konfiskimin e aseteve të shtetit shqiptar në mënyrë që të ekzekutohet vendimi financiar.
Një situatë e ngjashme ndodhi edhe në rastin e Francesco Becchetti, i cili fitoi arbitrazhin ndaj shtetit shqiptar dhe më pas nisi procedurat për sekuestrimin e llogarive të Shqipërisë në Eurocontrol, për të garantuar pagesën e detyrimit prej rreth 130 milionë eurosh.
Sipas vlerësimeve, fatura totale e proceseve të humbura në arbitrazh nga Shqipëria i kalon 200 milionë dollarët, ndërsa ndaj shtetit shqiptar vijojnë edhe procese të tjera ndërkombëtare për të cilat ende nuk ka një vendim përfundimtar.
