Pas drejtësisë sfidoi fuqishëm edhe qeverinë, gjykatësi i Apelit pjesë e meselesë për guroret në malin e Tomorrit

Google+ Pinterest LinkedIn Tumblr +

Më 3 gusht të vitit të kaluar, Gjykata e Apelit Administrativ, hodhi poshtë Vendimin e Këshillit të Ministrave, për zgjerimin e zonës së mbrojtur në Parkun Kombëtar të Malit të Tomorrit.

Qeveria kishte vendosur që ta kthente edhe më herët në park Kombëtar të gjithë malin e Tomorrit, por një shoqatë jofitimprurëse që gruponte pronarët e guroreve, ankimoi vendimin në gjykatë.

Shoqata e shoqërive të Veprimtarisë Minerare Berat “Emiljano Sh.p.k”, ka paditur më datë 02.10.2019 Këshillin e Ministrave për VKM-në për zgjerimin e zonës së mbrojtur në Malin e Tomorrit.

Pjesë e trupës gjykuese, që votoi kundër qeverisë ishte edhe Amarildo Laçi, anëtar i Gjykatës së Apelit Administrativ një emër i lakuar shumë, për disa vendime absurde. Lexo këtu

Duke u pozicionuar krah gjyqtarëve të cilët votuan kundër qeverisë, Laçi vuri një gur më tepër në shkatërrimin e malit të Tomorrit nga bizneset e guroreve, dëme këto të pakthyeshme, jo vetëm për shkak të gërmimit, por edhe për largimin e kafshëve.

Pjesë e kësaj meseleje u bë dhe Laçi, i cili e shtoi këtë çështje në listën e vendimeve të kontestuara, për të cilat duhet të japë shpjegim gjatë procesit të rivlerësimit.

Ky vendim, duhet të merret parasysh nga Komisioni i Pavarur i Kualifikimit, kur ai të futet në sitën e vettingut.

Laçi do të ketë shumë të vështirë të justifikojë pozicionimin kundër qeverisë, pasi bie ndesh gjithashtu me interesin e qytetarëve të cilët protestuan fortë, por edhe me operatorët turistikë, që dhanë alarmin se po shkatërrohej turizmi në zonë.

Sipas qytetarëve të cilët protestuan me pankarta, ky vendim mbron interesat e ngushta të biznesmenëve të guroreve.

Ata gjithashtu nisën firmosjen e një peticioni kundër ndalimit të zgjerimit të parkut kombëtar në Tomorr, ndërsa pjesë e protestës së tyre u bë edhe ministri i Mjedisit dhe Turizmit Blendi Klosi.

Ky i fundit deklaroi se vendimi i Apelit Administrativ, do të ankimohet në Gjykatën e Lartë.

Gazetareforma.com është interesuar pranë Gjykatës së Lartë, për të mësuar, nëse Klosi e ka mbajtur fjalën për ankimimin në Gjykatën e Lartë të kësaj çështjeje.

Mirëpo Amarildo Laçi përveç qeverisë, në të shkuarën ka sfiduar fuqishëm edhe drejtësinë shqiptare.

Ai liroi nga burgu në 2016-ën, tre anëtarët e bandës së Cërrikut, të akuzuar për vrasjen e 6 gardistëve në vitin e mbrapshtë 1997.

As figura profesionale e Laçit, e cila është një nga tre shkallët e vettingut, nuk është shumë e pastër.

Kjo për shkak se në 2008-ën, djali i xhaxhait të tij, Kujtim Laçi, u akuzua për trafik armësh.

Për të vërtetuar nëse kushërinjtë kishin lidhje, Ministria e Brendshme asokohe paralajmëroi hetim për Laçin, mirëpo nuk dihet si kanë shkuar hetimet, nëse ka pasur sigurisht.

Gjyqtari i Apelit Administrativ kishte krijuar skemat e tij për vendimet absurde, duke i zvarritur çështjet me periudha shumë të gjata kohore, duke tejkaluar kështu disa herë mesataren e këtij institucioni.

Për të gjitha faktet e sipërpërmendura, gazetareforma.com ka kontaktuar me autoritetet përgjegjëse dhe është në pritje të një përgjigjeje, për të hedhur më shumë dritë rreth figurës së gjyqtarit të shumëpërfolur të Gjykatës Administrative të Apelit.

Shpërndaje
Share.

Komento