Emirjana Sako është emëruar si kryebashkiakja e re e Durësit me vendim të Këshillit Bashkiak të Durrësit, që u mblodh pas dorëheqjes së ish-kryebashkiakut Zhuljen Varfaj.
Sako më parë ka mbajtur postin e drejtoreshës së Shërbimeve në Bashkinë e Durrësit dhe të zv.kryetares dhe njihet si një nga njerëzit më pranë Vangjush Dakos, kryetarit historik të Bashkisë Durrës, i larguar pas tri mandatesh dhe publikimit të përgjimeve të BILD.
Ditën e sotme me anë të një letre drejtuar zyrtarëve të tjerë të Bashkisë Durrës, Zhujen Varfaj shkruante se për arsye shëndresore nuk mund të vijonte të ishte më në krye të institucionit pasi kishte rrezik të shtuar për shëndetin.
Dorëhiqet kreu i Bashkisë së Durrësit, ja kush pritet të zëvendësojë Zhuljen Varfajn
Kujtojmë se ndryshimet e kryebashkiakëve në Durrës nisën që pas dorëheqjes së Valbona Sakos, e cila u zgjodh si kryetare nga zgjedhjet e 30 qeshorit, por u tërhoq në nëntor, disa ditë pas tërmetit që shkaktoi 51 viktima.
Ish-kryebashkiakja e Durrësit Valbona Sako dha dorëheqjen nga posti i saj pas gafave të bëra në dy deklarata që dha publikisht, ku u shpreh se ishte e lumtur që ishin regjistruar vetëm 51 viktima dhe se qytetarat janë dërguar në hotele me 5 yje, ku në gjendje normale nuk do të kishin kurrë mundësi të shkonin.
Pas saj u emërua si kryebashkiak i komanduar me votat e Këshillit Bashkiak, Zhuljen Varfaj për t’u zëvëndësuar nga Sako.
Njoftimi i plotë
Këshilli Bashkiak miratoi edhe disa vendime të tjera që janë:
-Prishja e detyruar e ndërtesave me emërtimin “Qendra Shëndetësore” që mbajnë numrin 15 dhe 17 të listës, të cilat me VKM nr. 295, dt.2.5.2012 kanë kaluar në pronësi të komunës Ishëm(sot Bashkia Durrës), për shkak se janë dëmtuar nga fatkeqësia natyrore e datës 26 nëntor 2019 dhe se nuk mund të riparohen sipas aktekspertizës së thelluar realizuar nga Instituti i Ndërtimit dhe miratimin për heqjen nga kontabiliteti dhe lista përfundimtare e pronave të paluajtshme, të pronës me nr.15 me vendodhje në fshatin Likmetaj dhe nr.17 me vendodhje në fshatin Draç, njësia administrative Ishëm, me emërtimin “Qendra Shëndetësore”.
-U miratua në parim prishja e detyruar e 12 ndërtesave pronë private, në zbatim të ekspertizave të thelluara të hartuara nga Instituti i Ndërtimit.
-U miratua prishja e detyruar e tre ndërtesave pjesë përbërëse të shkollës 9-vjeçare “Njazi Mastori”, që mbajnë nr. 6, 12 dhe 17 të listës, të cilat me VKM nr.297, dt. 28.04.2010 kanë kaluar në pronësi të bashkisë Sukth(sot Bashkia Durrës), për shkak se janë dëmtuar nga fatkeqësia natyrore e datës 26 nëntor 2019 dhe riparimi mund të jetë shumë i kushtueshëm, sipas aktekspertizës së thelluar realizuar nga Instituti i Ndërtimit dhe miratimin për heqjen nga kontabiliteti dhe lista përfundimtare të tre pronave pjesë përbërëse të shkollës 9-vjeçare “Njazi Mastori” që mbajnë nr. 6, 12 dhe 17 me vendodhje në qendër Sukth, njësia administrative Sukth.
