Është gjetur i pajetë pas 5 ditësh kërkime, trupi i pajetë i prezantuesit të BBC, Michael Mosley. Ai është gjetur në një zonë shkëmbore të plazhit të Agia Marinës, ku ishin përqendruar kërkimet e autoriteteve.
Më konkretisht, kryebashkiaku i Symit, Lefteris Papakalodoukas, ishte futur në një gomone me gazetarë, për t’u treguar pikat e rrezikshme. Aty kamerat e celularëve kanë pikasur trupin e prezantueses 67-vjeçar teksa kanë marrë video dhe pamje nga zona.
Në vendngjarje ka mbërritur menjëherë roja bregdetare për të bllokuar zonën, dhe për të bërë të mundur transportimin e trupit drejt morgut.
Sipas Independent, zjarrfikësit po kryenin kërkime në disa shpella pranë zonës, të cilët banorët e ishullit i përshkruanin si “humnera”. Siç sqarojnë ata, rrjeti i shpellave, i cili ndodhet në një plazh piktoresk, përbëhet nga dhjetëra tunele, të cilat mund të mbushen shpejt me ujë deti, dhe të vështirësojnë daljen e personave që mund të kenë shkuar për t’i eksploruar.
Mosley u pa për herë të fundit duke u larguar nga plazhi i Shën Nikollës në orën 13:30 të mërkurën. Bashkëshortja e të ndjerit, duke folur për mediat greke, nuk i kishte humbur shpresat që Mosley të gjendej i gjallë, por fatkeqësisht një gjë e tillë nuk ndodhi.
