Kabineti i Sigurisë në Izrael ka miratuar propozimin e kryeministrit Benjamin Netanyahu për një ofensivë ushtarake në qytetin e Gazës, duke ndezur alarmin për një përshkallëzim të rrezikshëm të konfliktit në Lindjen e Mesme.
Ky hap, që synon mposhtjen e Hamasit, përfshin ndërhyrjen në zonat ende të pakontrolluara nga Izraeli dhe zhvendosjen e rreth një milion banorëve drejt jugut të Rripit të Gazës.
Sipas njoftimit zyrtar, operacioni ushtarak do të shënjestrojë fortifikimet e Hamasit në qytet, ndërsa trupat izraelite do të përpiqen të shmangin viktimat civile përmes ofrimit të ndihmës humanitare jashtë zonave të luftimit.
Zyra e Netanyahut bëri të ditur se plani është mbështetur nga shumica e ministrave, të cilët hodhën poshtë çdo alternativë që nuk garanton mposhtjen e Hamasit dhe kthimin e pengjeve.
Në deklaratën për mediat, u bë e ditur se kabineti ka miratuar pesë objektiva strategjikë për të përfunduar luftën:
1. Çarmatimi i Hamasit
2. Kthimi i të gjithë pengjeve (të gjallë dhe të vdekur)
3. Demilitarizimi i Rripit të Gazës
4. Kontrolli i sigurisë nga Izraeli mbi të gjithë Rripin
5. Krijimi i një administrate civile që nuk do të jetë as nga Hamasi dhe as nga Autoriteti Palestinez
Megjithatë, ky plan nuk është pranuar unanimisht. Shefi i Shtabit të Forcave të Mbrojtjes, Eyal Zamir, e cilësoi zhvendosjen e një milion banorëve si “jashtëzakonisht komplekse” dhe kritikoi mungesën e një zgjidhjeje reale humanitare për civilët. Ai propozoi gjithashtu që kthimi i pengjeve të mos jetë më një objektiv i drejtpërdrejtë i luftës.
Në të njëjtën kohë, jashtë ndërtesës së kabinetit, protestuesit kundërshtuan zgjerimin e operacionit ushtarak. Familjarë të pengjeve paralajmëruan se kjo ofensivë e re mund të përbëjë një “dënim me vdekje” për të afërmit e tyre.
Sipas raportimeve të OKB-së, situata humanitare në Gazë po përkeqësohet me ritme alarmante, me nivele të larta të kequshqyerjes te fëmijët dhe furnizime të pamjaftueshme ndihmash.
Ende nuk është e qartë nëse pushtimi do të përfshijë të gjithë Rripin e Gazës apo vetëm qytetin me të njëjtin emër, i cili përfaqëson rreth 25% të territorit që Izraeli nuk e ka marrë nën kontroll. Zona përfshin edhe kampet kryesore të refugjatëve ku besohet se mbahen edhe pjesa e mbetur e pengjeve.
Operacioni, sipas zyrtarëve izraelitë, mund të zgjasë të paktën gjashtë muaj dhe pritet të përbëjë një nga fazat më të ndërlikuara dhe më të diskutueshme të luftës që nisi në tetor 2023.
