Partia Demokratike ka kërkuar që KQZ t’i vërë në dispozicion të gjitha të dhënat teknologjike të procesit të votimit. Kërkesa është dërguar përmes përfaqësuesit ligjor dhe sekretarit për çështjet zgjedhore të PD, Ivi Kaso.
Në letrën që i drejtohet kreut të KQZ, Ilirjan Celibashi shkruhet se me anë të vëzhguesve në terren, PD ka grumbulluar e është ende duke grumbulluar të dhëna që dëshmojnë parregullsi të rënda në procesin zgjedhor dhe në veçanti gjatë fazës së numërimit. Për këto pretendime të ngritura, PD i ka kërkuar KQZ-së që të ketë në dispozicion:
-Pamjet filmike të çdo QV dhe KZAZ
-Pamjet filmike të kamerave regjistruese të çdo flete votimit të çdo KZAZ
-Të dhënat e grumbulluar nga pajisjet e identifikimit elektronik të çdo Qendre Votimi
-Të dhënat e kryqëzuar ndërmjet pajisjeve të identifikimit elektronik dhe listave të zgjedhësve të nënshkruar mekanikisht.
Kur ka mbetur vetëm pak nga mbyllja e numërimit të votave të çdo Qendre Votimi, është Partia Socialiste ajo që kryeson me 74 mandate të siguruara. Partia Demokratike ka arritur të marrë 59 mandate, ndërsa Lëvizja Socialiste për Integrim ka siguruar vetëm 4 mandate. Po ashtu tre mandate në parlament ka arritur t’i sigurojë edhe Partia Social Demokrate e Tom Doshit që ka marrë në total 34673 në të gjithë vendin.
