3 të rinj me inicialet A. S. 24 vjeç, K. L. 24 vjeç dhe A. R. 23 vjeç, banues në Kurbin janë vënë në pranga pasi parkuan automjetin e tyre në mes të rrugës në Laç, si dhe nën efektin e pijeve alkoolike, prishën qetësinë publike.
Njoftimi i Policisë: Drejtoria Vendore e Policisë Lezhë
Parkuan automjetin e tyre në mes të rrugës në Laç, si dhe nën efektin e pijeve alkoolike, prishën qetësinë publike, arrestohen në flagrancë 3 shtetas, të cilët kundërshtuan punonjësit e Policisë që ndërhynë për t’iu lëvizur automjetin dhe për të ndaluar zhurmën.
Oficerët e Policisë Gjyqësore të Prokurorisë pranë Gjykatës së Shkallës së Parë të Juridiksionit të Përgjithshëm Lezhë arrestuan në flagrancë shtetasit A. S. 24 vjeç, K. L. 24 vjeç dhe A. R. 23 vjeç, të tre banues në Kurbin, pasi mesnatën e djeshme, kanë parkuar automjetin e tyre në mes të rrugës kryesore të Laçit dhe dyshohet se nën efektin e pijeve alkoolike, kanë shkaktuar zhurmë duke vënë muzikë të lartë në automjet, sjellje e cila ka shqetësuar banorët e zonës.
Gjithashtu, të tre këta shtetas kanë kundërshtuar punonjësit e patrullës së përgjithshme të Komisariatit të Policisë Kurbin, të cilët kanë ndërhyrë për të lëvizur automjetin dhe për të marrë masa për largimin e tyre.
