Vendi ynë do të shoqërohet nga masa ajrore polare, të cilat do të na shoqërojnë në pjesën më të madhe të ditëve të kësaj jave.
Sot do të kemi mot të qëndrueshëm e të kthjellët me temperatura të ulëta në vlerat minimale, të cilat sjellin akulli në rrugët e vendit.
Ndërsa, dita e martë dhe e mërkurë do të karakterizohet nga masa ajrore të paqëndrueshme, që do të sjellin reshje shiu me intensitet mesatar e lokalisht të lartë.
Bora do të jetë prezente në veri, verilindje dhe juglindje kryesisht me intensitet deri mesatar në zonën e Bajram Currit, Kukësit, Peshkopisë dhe Korçës.
Era do të fryjë nga kuadrati i veriut 2-9m/s, hera-herës në bregdet dhe lugina fiton shpejtësi 13-25m/s duke u bërë problematike. Valëzimi në dete do të jetë i forcës 2-5 ballë.
