Është neutralizuar rreziku për jetët e njerëzve dhe banesat në zonën e lumit të Vlorës, ku flakët dolën jashtë kontrollit ditën e sotme. Ministri i Mbrojtjes, Niko Peleshi ka njoftuar se katastrofa është parandaluar nga ndërhyrja masive e trupave nga ajri dhe nga toka.
Po ashtu, Peleshi njofton se në Karaburun ka rifilluar ndërhyrja nga ajri, ndonëse në kushte të vështira klimatike për fluturim. Po ashtu janë bërë ndërhyrje edhe në Vithkuq, Mallakastër, Tarabosh, Tropojë, Kukës e Delvinë etj.
“Lajm i mirë – Parandalohet katastrofa në zonën e lumit të Vlorës, ndërhyrja masive e trupave nga toka dhe ajri ka neutralizuar rezikun e jetës dhe banesave atje.
Në mbështetje të operacionit nga toka, në Karaburun ka rifilluar edhe ndërhyrja nga ajri, ndonëse në kushte të vështira klimatike për fluturim.
Ndërhyrje gjithashtu janë bërë edhe ne Vithkuq (Korçë) në Mallakastër, në Tarabosh, (Shkodër) Qerem,(Tropojë), Kalise (Kukës), Mavropull, (Delvinë) etj”, shkruan Niko Peleshi.
Situata në Gjorm, në zonën e lumit të Vlorës u paraqit e rënduar ditën e sotme, ku flakët rrezikuan edhe disa banesa, ndërsa u urdhërua edhe evakuimi i banorëve. Flakët u përhapën me shpejtësi edhe nga era e fortë, e cila bëri të vështirë edhe ndërhyrjen nga ajri në zonë.
