Kryetari i Partisë Demokratike Lulzim Basha ka mbledhur ditën e sotme grupin parlamentar ku në fokus të diskutimit ka qenë paralajmërimi i kryeministrit Edi Rama në lidhje me rritjen e çmimit të energjisë elektrike ku ndërkohë shpalli dhe gjendjen emergjente. Sipas informacioneve të zbardhura nga “BalkanWeb” mësohet se kryedemokrati Basha ka dërguar edhe një mesazh drejt deputetëve të opozitës ku u ka kërkuar që në këtë krizë të paralajmëruar, të rrinë sa më në kontakt me qytetarët për të ditur shqetësimet e tyre.
Basha: I rëndësishëm është konktakti direkt me qytetarët për të nxitur, inkurajuar, organizuar të gjitha format e rezistencës ndaj skemave të Edi Ramës për boshatisjen e xhepave të qytetarëve.
Në lidhje me këtë çështje dhe deklaratën e kryeministrit Edi Rama ditën e djeshme kreu i Partisë Demokratike, Lulzim Basha, propozoi një plan me 7 pika që sipas tij do të nxjerrin vendin nga kriza.
Për kreun e qeverisë shqiptare kjo është një fatkeqësi e re natyrore e kombinuar me faktorë gjeopolitikë dhe manovra tregtare. Por Basha nuk mendon kështu, ai ka thënë se bota po përballet tani me këtë krizë, ndërsa vendi ynë sipas tij ka 8 vite që përballet me çmimet më të larta në rajon e ndër më të lartat në Europë, të energjisë dhe karburanteve.
“Ndaj prioritetet në këtë moment të parë janë të qarta dhe të domosdoshme:
1- Heqja e taksës Rama prej 240 lekë për litër karburanti;
2- Ulja e TVSH-së nga 20% në 6% për ushqimet, ashtu siç kemi kërkuar prej javës së parë në kuvendin e Shqipërisë;
3- Faturimi me çmime dhe sasinë reale të konsumit të oligarkëve të cilët favorizohen në kurriz të konsumatorëve;
4- Subvencionim i çmimit të energjisë për qytetarët;
5- Mirëmenanxhim dhe ndalje e shpenzimeve të shfrenuara, luksoze të OSHEE dhe KESH, që janë kthyer në zhvatës të parave të shqiptarëve.
6- Ristrukturim të buxhetit për tu përballur me një krizë që nuk mund të ndalet me propagandë dhe fjalime.
7 – Më shumë para për shtresat në nevojë dhe ristrukturim të ekonomisë aktuale, e cila për shkak të politikave të kësaj qeverie është e varur nga paraja e pisët dhe monopolet e oligarkëve.”, plani me 7 pika që ka propozuar kreu i Partisë Demokratike, Lulzim Basha.
