Përfaqësuesi i Lartë i Bashkimit Europian për Politikën e Jashtme dhe Sigurinë, Josep Borrell, paralajmëroi se mundësia e një lufte me intensitet të lartë në Evropë nuk është më një fantazi. Sipas transkriptit të fjalimit të tij të publikuar nga Shërbimi Evropian për Punë të Jashtme, Borrell tha se Evropa sot po ndjen se një sfidë po i afrohet. Ndaj edhe duhet punuar për një projekt lidhur me sigurinë dhe mbrojtjen e përbashkët.
“Unë mendoj se ne po jetojmë një moment shumë të rëndësishëm në procesin e ndërtimit të Evropës, sepse lufta është padyshim në horizont. Lufta në Ukrainë zbuloi brutalisht botën ashtu siç është, jo siç do donim të ishte. Është një botë e shënjuar nga kërcënimi rus ndaj BE-së në tërësi. Kjo nuk do të thotë se lufta është e afërt dhe se ajo do të fillojë nesër. Por ne duhet t’i bëjmë qytetarët e BE-së të kuptojnë se ombrella amerikane që na mbrojti gjatë Luftës së Ftohtë dhe pas saj, mund të mos jetë e hapur gjatë gjithë kohës,“-tha Borrell.
Kështu që theksoi se Evropa duhet të ndërtojë kapacitetin e saj të përbashkët mbrojtës.
“NATO do të mbetet absolutisht i pazëvendësueshëm. Por brenda NATO-s ne duhet të ndërtojmë një shtyllë të fortë evropiane. Lufta kundër nesh nuk do të fillojë nesër. Por ne nuk mund ta mohojmë realitetin: ka konkurrencë në rritje midis fuqive të mëdha, ka konflikte me intensitet të lartë midis shteteve, lufta kibernetike dhe dezinformimi janë pjesë e realitetit tonë,”-shtoi ai.
