Në një moment të ngarkuar me ndjenjë dhe shpresë, Papa Leoni XIV iu drejtua besimtarëve në audiencën e përgjithshme të së mërkurës në Sallën Pali VI, duke e shndërruar atë në një thirrje të fuqishme universale për paqe. Duke folur përpara qindra pelegrinëve, ai rikujtoi plagët e hapura të botës dhe vuajtjet që vazhdojnë nga konfliktet e armatosura.
Papa përshëndeti me ngrohtësi besimtarët polakë, si ata të pranishëm në Romë, ashtu edhe ata në pelegrinazh në Shenjtëroren e Zonjës së Jasna Górës. “Të përfshini në qëllimet tuaja lutjen për dhuratën e paqes, të paarmatosur dhe çarmatosëse, për të gjithë botën, veçanërisht për Ukrainën dhe Lindjen e Mesme”, tha ai, duke theksuar se plagët e luftës nuk pushojnë së gjakosuri Tokën e Shenjtë, Ukrainën dhe shumë rajone të tjera të botës.
Me një ton të thellë dhe prekës, Papa i ftoi të gjithë besimtarët që më 22 gusht të bashkohen në një ditë agjërimi dhe lutjeje. “Iu lutemi Zotit të na dhurojë paqe dhe drejtësi, dhe të thajë lotët e atyre që vuajnë për shkak të konflikteve të armatosura të vazhdueshme”, nënvizoi ai.
Në përfundim të fjalës së tij, Papa Leoni XIV kujtoi se e premtja është një ditë e veçantë për Kishën, pasi përkujton Virgjëreshën e Bekuar Mari, të thirrur edhe si Mbretëresha e Paqes. “Maria, Mbretëresha e Paqes, ndërmjetësoftë që njerëzit të gjejnë rrugën drejt paqes”, përfundoi ai, duke lënë pas një mesazh që rezonoi thellë në zemrat e të pranishmëve.
Thirrja e Papës u shndërrua kështu jo vetëm në një apel shpirtëror, por edhe në një kujtesë të fortë se në mes të errësirës së luftërave, njerëzimi ka ende nevojë për dritën e shpresës dhe forcën e paqes.
