Që nga fillimi i pandemisë e deri më sot, mësohet se 8 punonjës policie në qarkun e Tiranës janë konfirmuar pozitivë me koronavirus.
Disa prej tyre mësohet se kanë infektuar edhe familjarët, e ndërsa bëhet fjalë për punonjës të policisë që shërbenin pranë recepsioneve në pritje të qytetarëve.
Personi i fundit që u konfirmua me koronavirus brenda radhëve të uniformave blu ishte një efektiv i Shqiponjave.
Sipas “ABC News”, ai u infektua tre ditë më parë.
Nga hetimi epidemiologjik ka rezultuar se efektivi i Shqiponjave është infektuar gjatë punës në terren në momentet kur ka qenë duke shoqëruar persona të ndryshëm në komisariat.
Gjithashtu bëhet e ditur se autoritetet shëndetësore u kanë bërë tamponë kolegëve të oficerit të infektuar por edhe të afërmve të tij.
Këta të fundit për fat të mirë kanë rezultuar negativë.
Edhe punonjësit e tjerë të infektuar më herët ishin punonjës policie të cilët shërbenin tek pritja e qytetarëve.
Si është edhe rasti i një 49-vjeçari, që shërbente në recepsionin e Drejtorisë Vendore të Policisë së Tiranës.
Pak javë më parë ai u prek nga virusi në punë ndërsa infektoi edhe familjarët.
Pas rezultatit pozitiv me koronavirus, efektivi u shtrua në spitalin Infektiv.
Por duke qenë se 49-vjeçari vuante edhe nga problemet me zemrën pësoi komplikacione dhe u zhvendos në pavionin e kardiologjisë.
Sipas “ABC News” punonjësi i policisë më 17 ndërroi jetë ndërsa askush nga të afërmit nuk mund të thotë se cili ishte shkaku i vdekjes së policit.
As nga instancat përkatëse nuk pati asnjë reagim për të sqaruar nëse 49- vjeçari ishte shëruar nga koronavirusi përpara se të transferohej në kardiologji.
