Këshilli i Lartë Gjyqësor ka deklaruar se ngecja e procesit të vlerësimit për kandidatin për anëtar të katërt të Gjykatës së Lartë nga radhët e jogjyqtarëve, emërimi i të cilit do t’i jepte fundit përplasjeve të forta për mandatin e Ardian Dvoranit ka ardhur si pasojë e Covid-19.
KLGJ ka thënë për News24 se procesi i verifikimit të kandidatit Dariel Sina ka ngrirë dhe nuk mund të përfundojë derisa puna në institucion t’i kthehet normalitetit, ndërkohë që qeveria e gjyqësorit po zhvillon aktivitetin online dhe sqaron se është në pamundësi që nëpërmjet platformës kompjuterike “Microsoft Teams” të shqyrtojë të dhëna personale apo informacione të klasifikuara sekret për kandidatin, pasi ekziston rreziku që të rrjedhin në publik.
Nga ana tjetër, në rast të organizimit të mbledhjes plenare në një ambient tjetër, të ndryshem nga salla ku zhvillon aktivitetin, KLGJ është në pamundësi të diskutojë për këtë cështje, pasi informacionet sekrete duhet të trajtohen në një ambient të klasifikuar si Zonë e Sigurisë të Klasit të I-rë.
“Drejtoria e Sigurimit të Informacionit të Klasifikuar ka theksuar se informacionet e klasifikuara “Sekret shtetëror” duhet të administrohen vetëm nëpërmjet mjeteve, platformave, paisjeve dhe rrjeteve të çertifikuara përshtashmërisht më parë nga DSIK-ja. Në në kushtet e punës në distancë është rreptësisht i ndaluar përdorimi i tyre, duke përdorur internetin”.
Megjithatë, me përmirësimin e situatës së krijuar nga Covid-19, pritet që çështja e kandidatit do të trajtohet me prioritet.
Dariel Sina, aktualisht komisioner publik, që garanton interesat e publikut në procesin e vettingut është kandidati i vetëm për vendin e 4 vakant në Gjykatën e Lartë nga radhët e jogjyqtarëve.
Deri tani janë emëruar Sokol Sadushaj, Ervin Pupe dhe Ilir Panda.
Ardian Dvorani, vijon të qëndrojë në detyrë edhe pse mandati i ka përfunduar që në 2014, me argumentin se pret anëtarin zëvendësues dhe derisa vendi vakant të plotësohet, Dvorani do të jetë në krye të Këshillit të Emërimeve në Drejtësi, post për të cilin është kallëzuar në SPAK nga Presidenti i vendit, Ilir Meta.
Sipas Metës, Dvorani s’mund të jetë më anëtar i Gjykatës së Lartë pasi mandati i tij ka mbaruar para 6 viteve dhe tashmë vakancat minimale janë plotësuar.
Nga ana tjetër, Dvorani kërkoi kohë për të paraqitur dokumentat e tij, kërkesë e cila u pranuar nga KLGJ-ja.
Por përplasja Meta-Dvorani nis më herët.
Kreu i shtetit ka hedhur akuza të forta kundër kreut të KED, pasi ka thënë se ai ka shkelur Kushtetutën në lidhje me emërimet e anëtarëve të Gjykatës Kushtetuese.
